Зеленски: Ирска е со Украина уште од почетокот на руската инвазија

Украинскиот претседател Володимир Зеленски денеска во Даблин ѝ се заблагодари на Ирска за поддршката што ѝ ја дава на Украина од почетокот на руската инвазија, а воедно упати и апел за забрзување на процесот на пристапување на земјата во Европската Унија.

— реклама —

Обраќајќи се на свеченото отворање на ирското претседателство со Советот на Европската Унија, Зеленски предупреди дека во Европа сè уште постојат компании кои, како што рече, се во сопственост или под ефективна контрола на Русија и на санкционирани руски олигарси.

— реклама —

„За жал, во Европа има компании чија единствена цел е да работат за Русија. Тие и понатаму го снабдуваат агресорот со клучни материјали, дури и сега“, изјави Зеленски.

Тој директно му се обрати на претседателот на Европскиот совет, Антонио Кошта, барајќи побрзо отворање на нови преговарачки кластери за членство на Украина во Европската Унија.

— реклама —

„Можеме да отвориме уште пет кластери, Антонио. Што мислиш?“, рече Зеленски, на што Кошта од публиката низ насмевка одговори: „Можеби“.

Претходно во текот на денот, Зеленски пристигна во Ирска, каде што на аеродромот го пречека заменик-премиерот и министер за финансии Сајмон Харис. Ирска во следните шест месеци ќе претседава со Советот на Европската Унија, а меѓу приоритетите ги истакна конкурентноста, вредностите и безбедноста.