Зеленски ја менува премиерката, следува реконструкција на Владата

Украинскиот претседател Володимир Зеленски предложи смена на премиерката Јулија Свириденко и најави реконструкција на Владата, објави самиот на социјалната мрежа Икс.

Зеленски ѝ се заблагодари на Свириденко за досегашната работа и откри дека ѝ понудил да преземе нова, важна улога поврзана со односите со еден од клучните партнери на Украина.

— реклама —

„Благодарен сум ѝ на Јулија за нејзината јасна, посветена и ефикасна работа како премиерка, како и за годините служба во украинскиот тим. Очекувам, заедно со пратениците, да ги спроведеме потребните промени во Владата“, напиша Зеленски.

— реклама —

Тој објасни дека промените се дел од обновената политичка стратегија, но не откри повеќе детали.

Свириденко беше именувана за премиерка во јули 2025 година. Зеленски не прецизираше која функција ќе ја извршува во иднина ниту кој ќе ја наследи на премиерската позиција, но најави и промени во раководството на институциите задолжени за спроведување на законот.

— реклама —

Опозицискиот пратеник Јарослав Железњак изјави дека Свириденко најверојатно ќе биде именувана за амбасадорка на Украина во Соединетите Американски Држави.

— реклама —

Според украинските закони, оставката или разрешувањето на премиерот мора да биде одобрено од парламентот, а со тоа автоматски следува оставка на целата Влада.

Како можни наследници на Свириденко се споменуваат министерот за енергетика Денис Шмихал, министерот за одбрана Михајло Федоров и директорот на државната енергетска компанија „Нафтогас“, Серхиј Корецки.