Украина ќе го засили дипломатскиот, економскиот и воениот притисок врз Русија со цел војната да заврши пред почетокот на зимата, изјави украинскиот претседател Володимир Зеленски.
Говорејќи на средба со украинските амбасадори во Киев, Зеленски рече дека целта е мировен договор да биде постигнат до есен, но нагласи дека не може да гарантира кога тоа ќе се случи.
„Ќе направиме сè што можеме тоа да се случи пред зимата, во текот на есента. Но, знаеме со кого имаме работа и дека Путин се надева на продолжување на војната“, изјави Зеленски.
Тој оцени дека рускиот претседател Владимир Путин подготвува нова мобилизација и нови напади, поради што Украина ќе ги координира дипломатските иницијативи, воените операции и санкциите со своите сојузници.
Според Зеленски, целта е да се создаде толкав притисок врз Москва што Русија нема да има друга опција освен да прифати мир. Тој додаде дека Украина ќе продолжи со напади врз клучната руска воена, логистичка и енергетска инфраструктура, паралелно со економските санкции што ги воведуваат западните партнери.
