Зеленски најави можни мировни разговори меѓу Украина, Русија и САД во Абу Даби

Украина, Русија и САД би можеле да одржат технички разговори за мир во првата половина на ноември во Абу Даби, најави украинскиот претседател Володимир Зеленски. Тој изрази надеж дека по овие разговори ќе следи и средба на лидерите на трите земји.

— реклама —

Зеленски соопшти дека разговарал со американските пратеници Џаред Кушнер и Стив Виткоф, по нивната средба со рускиот претседател Владимир Путин претходно оваа недела. Тој нагласи дека секој мировен договор мора да вклучува безбедносни гаранции за Украина и десетгодишно финансирање на украинската армија.

— реклама —

„Планот е да се сретнеме во првата половина на ноември, што е можно порано“, изјави Зеленски преку видеоврска за Институтот „Хадсон“. Тој додаде дека многу работи зависат од Русија, потсетувајќи дека слична средба, планирана за овој месец, не се одржала.

Украинскиот претседател ја истакна важноста на продолжувањето на дипломатските напори за постигнување примирје и завршување на војната, која влегува во петтата година. Според него, во преговорите треба да биде вклучена и Европа, а по техничките разговори мора да следат средби на лидерите на земјите.

— реклама —

Зеленски се осврна и на проблемите со пристапот на украинската армија до комуникациските системи „Старлинк“. Тој рече дека ограничувањата на брзината на „Старлинк“ и „Старшилд“ сè уште се на сила и дека услугите не се вратени на претходното ниво, спротивно на тврдењето на американскиот претседател Доналд Трамп дека целосно се обновени.

Украина, исто така, сè уште ја очекува испораката на претходно договорените пресретнувачи за противвоздушна одбрана. Зеленски посочи дека Киев се соочува со сериозни предизвици поради речиси секојдневните масовни руски напади со дронови и ракети.