Украинската служба за безбедност (СБУ) денеска соопшти дека во рамки на нова 40-дневна операција на Крим, нејзините беспилотни летала погодиле руски помошни воени бродови во изградба и противвоздушен систем С-400 во окупираниот Керч.
Според СБУ, операцијата има за цел да ја намали способноста на Русија да го користи Крим како воено и логистичко упориште, а била одобрена од украинскиот претседател Володимир Зеленски.
Како што наведуваат украинските власти, нападот бил насочен кон бродоградилиштето „Залив“ во Керч и кон руската противвоздушна одбрана што го штити Керченскиот теснец. Погодени биле бродовите за поставување кабли „Волга“ и „Вјатка“, како и патничко-товарниот траект „Петропавловск“, кој бил завршен 96 проценти. Според СБУ, на погодените пловни објекти избувнале големи пожари.
Украинската служба тврди дека бродовите „Волга“ и „Вјатка“ се граделе за руското Министерство за одбрана и требало да бидат опремени со подводни акустични системи за откривање подморници. Дополнително, тие, наводно, можеле да поставуваат и морски мини.
Освен бродовите, украинските дронови, според СБУ, погодиле и радарска станица и вооружување на противвоздушниот ракетен систем С-400, кој го штити подрачјето на Керченскиот теснец.
Од украинската служба посочуваат дека континуираните напади врз руската воена инфраструктура на окупираниот Крим имаат за цел да ја ослабат способноста на Москва да го користи полуостровот како воен и логистички центар.
Украинскиот претседател Володимир Зеленски вчера соопшти дека одобрил 40-дневна операција на СБУ со цел да се изврши дополнителен притисок врз Русија за да се поттикне завршување на војната.
Засега нема официјална реакција од руската страна во врска со тврдењата на украинските власти.
