Украинскиот претседател Володимир Зеленски до парламентот достави предлог-закон за формирање на Украински национален пантеон, меморијален комплекс во кој ќе им се оддава почит на најистакнатите личности од украинската историја.
Како што пренесува „Украинска правда“, повикувајќи се на официјални соопштенија од кабинетот на претседателот, целта на проектот е трајно да се зачува сеќавањето на луѓето кои придонеле за создавањето и развојот на украинската држава.
„Имињата на сите херои кои се бореле за Украина и ја инспирирале низ вековите ќе бидат обединети и засекогаш запишани во нашата историја со голема почит од државата“, порача Зеленски.
Според предлог-законот, Националниот пантеон ќе биде изграден во Киев и ќе биде отворен за јавноста. Владата ќе биде задолжена за реализација на проектот, а идејното решение ќе биде избрано преку јавен конкурс.
Во Пантеонот ќе можат да бидат погребани или одбележани поранешни шефови на државата, претседатели, воени команданти, личности со исклучителни заслуги за државата, како и добитници на Нобелова награда.
Шефот на кабинетот на Зеленски, Кирило Буданов, изјави дека никој повеќе нема да им диктира на Украинците кои херои треба да ги почитуваат.
„Нашите предци со векови се бореле за правото на слобода и национална независност, а денес за истата цел крв пролеваат украинските војници“, порача Буданов.
Законот предвидува и воспоставување Книга на сеќавање, како и постојана почесна стража која ќе го обезбедува комплексот. Финансирањето на проектот ќе биде обезбедено од државниот буџет.
