Русија предложи привремен прекин на огнот во Костјантиновка, град на фронтската линија во источна Украина, со цел да се овозможи преземање на телата на загинатите украински војници.
Според руското Министерство за одбрана, прекинот на борбените дејства е предложен за 6 јули, во периодот од 12 до 18 часот по московско време. Од Москва побараа Украина да се изјасни за предлогот најдоцна до 5 јули напладне.
Во меѓувреме, портпаролот на Кремљ, Дмитриј Песков, изјави дека украинскиот претседател Володимир Зеленски, доколку сака разговори со рускиот претседател Владимир Путин, треба да отпатува во Москва, отфрлајќи ја можноста средбата да се одржи во Костјантиновка.
Предлогот за примирје доаѓа по спротивставените информации од руските власти за состојбата во градот. Додека дел од руските претставници тврдеа дека Костјантиновка е целосно под руска контрола, руското Министерство за одбрана подоцна соопшти дека борбите таму сè уште продолжуваат.
Од украинска страна ги отфрлија руските тврдења. Зеленски оцени дека станува збор за „уште една руска лага“, а украинскиот Генералштаб соопшти дека градот останува под украинска контрола, иако борбите се интензивни.
Костјантиновка, заедно со Славјанск и Краматорск, претставува еден од најважните одбранбени центри на Украина во Доњецката област.
