Украинскиот претседател Володимир Зеленски изјави дека рускиот претседател Владимир Путин ја загубил иницијативата во војната, оценувајќи дека развојот на украинската воена технологија значително ја променил состојбата на бојното поле.
Во интервју за „Фокс њуз“, Зеленски посочи дека Украина од почетокот на војната изградила силен воено-технолошки сектор со околу 500 компании кои развиваат современи технологии, особено во областа на беспилотните летала.
„Мораме да бидеме побрзи од Путин. Тој има повеќе луѓе, а ние мораме да ги заштитиме нашите граѓани и затоа се потпираме на технологијата“, изјави Зеленски.
Тој додаде дека Украина покажала способност да изведува напади длабоко на руска територија, како и врз воени цели на Крим, оценувајќи дека токму поради тоа иницијативата на фронтот преминала на украинска страна.
Зеленски тврдеше и дека Русија месечно губи околу 30.000 војници, но дека и покрај тоа Путин не покажува подготвеност за завршување на војната.
Осврнувајќи се на можноста за мировни преговори, украинскиот претседател рече дека Киев секојдневно повикува на прекин на огнот за да се создадат услови за дипломатски разговори, но, според него, Москва не е заинтересирана за таков процес.
Тој потврди и дека на средбата во Белата куќа со американскиот претседател Доналд Трамп разговарал за проширување на одбранбената соработка, при што, како што наведе, Трамп се согласил Украина да добие лиценци за домашно производство на американските ракетни системи „Патриот“.
