Зеленски: Путин ќе остане во Кремљ до крајот на животот

Украинскиот претседател Володимир Зеленски изјави дека вооружените сили на Украина денес претставуваат практично „втора најсилна армија во НАТО“, иако земјата сè уште не е членка на Алијансата.

— реклама —

Во изјава за новинарите, пренесена од украинските медиуми, Зеленски нагласи дека Украина е важен партнер за НАТО и дека тоа, според него, го препознаваат лидерите на земјите-членки на Алијансата.

— реклама —

„На НАТО му е потребна Украина“, порача украинскиот претседател, додавајќи дека украинската армија во текот на војната покажала дека може успешно да им се спротивстави на руските вооружени сили, кои често се сметаат за едни од најмоќните во светот.

Украина сè уште не е членка на НАТО, а спречувањето на нејзиното приклучување кон западниот воен сојуз останува една од главните цели што Москва ги наведува од почетокот на конфликтот.

— реклама —

Зеленски се осврна и на рускиот претседател Владимир Путин, оценувајќи дека тој ќе остане на власт во Кремљ до крајот на својот живот и дека има амбиции за обновување на поранешниот Советски Сојуз, кој се распадна во 1991 година.

— реклама —

Според украинскиот претседател, без Украина таквата цел е невозможна, поради што, како што рече, неговата земја се наоѓа во центарот на долготрајниот конфликт со Русија.