Украинскиот претседател Володимир Зеленски изјави дека рускиот претседател Владимир Путин се подготвува за дополнителна мобилизација во Русија и за проширување на војната, повикувајќи на засилен меѓународен притисок врз Москва.
Изјавата ја даде на заедничката прес-конференција со ирскиот премиер Мајкл Мартин, кој денеска престојува во официјална посета на Киев.
„Разговаравме за заканите и реалните предизвици што нè очекуваат пред есента, кога Путин, според нашите информации, подготвува нови напади врз Украина, дополнителна мобилизација во Русија и проширување на војната“, рече Зеленски.
Тој го поздрави усвојувањето на 21. пакет санкции на Европската Унија против Русија и изјави дека ирскиот премиер го уверил оти ќе се залага и за подготовка на 22. пакет санкции. Зеленски додаде дека Украина ќе работи и со партнерите надвор од Европската Унија за усогласување на нивните санкциски режими со европските мерки.
Украинскиот претседател нагласи дека руските напади не престанале ниту еден ден од почетокот на целосната руска инвазија и дека и понатаму се цел на напади украинските градови и населени места.
Воедно, Зеленски му се заблагодари на ирскиот премиер за поддршката што Ирска ѝ ја дава на Украина, истакнувајќи дека посетата на Мартин на Киев претставува силен знак на солидарност.
