Зеленски: Русија одби разговори за запирање на нападите, Путин сака да продолжи со војната

Украинскиот претседател Володимир Зеленски изјави дека руската делегација на разговорите во Абу Даби одбила да разговара за намалување на тензиите во Црното Море и запирање на нападите врз украинската енергетска инфраструктура. Според него, украинската делегација добила информации дека рускиот претседател Владимир Путин е лут и сака да продолжи со нападите.

— реклама —

Зеленски повтори дека Украина никогаш нема да ја признае руската окупација на своите територии, без оглед на одлуките што би можеле да ги донесат САД. Тој го оцени како „малку чуден“ пристапот на Вашингтон, кој со Москва разговара за воспоставување нов безбедносен поредок.

— реклама —

На Самитот на Европската политичка заедница во Даблин, украинскиот претседател порача дека неговата земја не може да прифати повлекување од Донбас како услов за завршување на војната. Според него, американската страна често го отвора ова прашање, но станува збор за територија од суштинско значење за независноста на Украина.

Зеленски го обвини Путин дека има намера да го уништи животот во украинските градови, меѓу кои Киев, Днипро, Харков, Запорожје, Одеса и Херсон. Тој рече дека Украина подготвила планови за зајакнување на нивната отпорност, но дека ѝ е потребна дополнителна меѓународна поддршка.

— реклама —

Осврнувајќи се на разговорите меѓу американската и руската делегација во Москва, Зеленски ги оцени како сериозни и посочи дека биле опфатени повеќе важни прашања, меѓу кои размена на воени заробеници и безбедносни гаранции.

— реклама —

Тој најави средба во Даблин со специјалните пратеници на американскиот претседател Доналд Трамп, Стив Виткоф и Џаред Кушнер, кои претходно разговарале со Путин во Москва. Зеленски истакна дека враќањето на украинските војници од руско заробеништво е еден од најважните приоритети, а европските земји треба посебно да обрнат внимание на безбедносните гаранции.