Зеленски сè уште нема одлука за новиот министер за одбрана

Украинскиот претседател Володимир Зеленски изјави дека сè уште не донел конечна одлука кого ќе предложи за нов министер за одбрана, по смената на Михаило Федоров, која предизвика протести во Киев и Лавов.

— реклама —

Зеленски рече дека актуелниот министер за внатрешни работи Игор Клименко е еден од кандидатите што се разгледуваат, но нагласи дека одлуката сè уште не е донесена и дека до парламентот не е доставен официјален предлог.

— реклама —

Во меѓувреме, Врховната рада денеска го избра Сергеј Корецки за нов премиер на Украина со 289 гласа „за“. Тој ја наследува Јулија Свириденко, чија оставка беше прифатена на 14 јули, што автоматски доведе до оставка на целата влада.

Корецки е четвртиот премиер за време на мандатот на Зеленски. Пред неговото именување, тој пред пратениците од владејачката партија „Слуга на народот“ ги претстави приоритетите на идната влада.

— реклама —

Во Киев и Лавов денеска се одржаа протести на кои неколку стотици граѓани побараа Михаило Федоров да остане министер за одбрана. Според организаторите, во Киев протестирале повеќе од 1.400 луѓе, додека во Лавов се собрале околу 400 демонстранти.

— реклама —

Федоров претходно изјави дека за време на својот мандат го унапредил системот за јавни набавки, го зголемил бројот на беспилотни летала и вовел технолошки промени во украинската армија.