Зеленски со ултиматум до Лукашенко: Имате една недела, потоа ќе дејствуваме

Украинскиот претседател Володимир Зеленски ја обвини Белорусија дека активно помага во руските напади со дронови врз Украина и упати предупредување до властите во Минск да ја отстранат спорната комуникациска опрема во рок од една недела.

— реклама —

На заедничка прес-конференција во Киев со претседателот на Хондурас, Зеленски изјави дека на комуникациски кули во два белоруски региона кои граничат со Украина се поставени системи што, според Киев, се користат за координација на руски напади со беспилотни летала.

„Ако Лукашенко навистина не сака да биде дел од војната, тогаш нека ја исклучи и отстрани таа опрема. Нашите цивили секојдневно умираат поради тоа. Ако тој не го направи тоа, ние ќе го направиме“, порача Зеленски.

— реклама —

Тој нагласи дека не го прифаќа објаснувањето на белорускиот лидер Александар Лукашенко дека Белорусија не учествува во војната, потсетувајќи дека руските сили уште од почетокот на инвазијата ја користеле белоруската територија за напади врз Украина.

— реклама —

Зеленски дополнително ја обвини Белорусија дека има важна улога во снабдувањето на руската армија со гориво и логистичка поддршка.

Од друга страна, Лукашенко неодамна изјави дека Белорусија не претставува закана за Украина и дури му се извини на Зеленски за претходни остри изјави. Тој нагласи дека неговите коментари биле реакција на, како што рече, закани кои доаѓале од украинска страна.

Изјавите на Зеленски се меѓу најострите предупредувања што Киев досега јавно му ги упатил на Минск од почетокот на руската инвазија во февруари 2022 година.