Зеленски во сабота ќе оди во Турција, каде што ќе разговара со Ердоган за војната во Украина

Украинскиот претседател Володимир Зеленски во сабота ќе ја посети Турција, каде што во Истанбул ќе разговара со турскиот претседател Реџеп Таип Ердоган за војната со Русија и безбедносната состојба во Црното Море, соопшти турското претседателство.

— реклама —

Како што објави директорот за комуникации на турското претседателство, Бурханетин Дуран, разговорите ќе бидат насочени кон унапредување на билатералната соработка меѓу Турција и Украина, но и кон регионалните и меѓународните случувања, вклучително и руско-украинскиот конфликт.

— реклама —

Посетата следува по телефонскиот разговор меѓу Ердоган и американскиот претседател Доналд Трамп во средата. Тогаш турскиот претседател истакнал дека Турција е подготвена да ги поддржи напорите за обновување на преговорите меѓу Украина и Русија со цел завршување на војната.

— реклама —

Турција претходно им доставила на Киев и Москва меморандум за разбирање со цел запирање на нападите врз трговските бродови во Црното Море. Документот бил подготвен врз основа на договорот за жито од јули 2022 година, постигнат со посредство на Турција и Обединетите нации, кој бил во сила само една година.

Анкара, која одржува блиски односи и со Москва и со Киев, редовно нуди да биде домаќин на евентуални мировни преговори меѓу двете земји.