Зеленски: Завршија ограничувањата, Украина ќе продолжи да ги напаѓа руските рафинерии

Украина нема повеќе да се ограничува во нападите врз руските нафтени рафинерии, порача украинскиот претседател Володимир Зеленски во интервју за британскиот весник „Фајненшл тајмс“, отфрлајќи ја можноста за продолжување на привременото запирање на ударите врз руската енергетска инфраструктура.

„Ограничувањето на нападите врз рафинериите повеќе не важи. Со тоа заврши“, изјави Зеленски, истовремено критикувајќи ја подготвеноста на Вашингтон да склучува деловни договори со Москва и, како што оцени, очигледното воодушевување на американскиот претседател Доналд Трамп од рускиот претседател Владимир Путин.

— реклама —

Во саботата, Трамп ја повика Украина да го смени Зеленски и остро ги осуди украинските напади врз руската нафтена инфраструктура. Неговите изјави следуваа еден ден откако најави договор со Русија за испорака на дизел-гориво, со цел да се ублажи притисокот врз цените на горивата, кои растат од почетокот на американско-израелската војна со Иран во февруари.

Зеленски претходно неделава соопшти дека Украина ги прекинала нападите врз руските нафтени рафинерии и другата енергетска инфраструктура во времетраење од два дена, откако Трамп објавил договор за енергетско примирје.

— реклама —

И покрај привременото запирање на нападите, украинскиот претседател тврди дека украинските сили останале без американските системи за рано предупредување за балистички ракети. Во исто време, услугата за сателитска комуникација „Старлинк“, во сопственост на Илон Маск, била забавена низ Украина, што ги отежнало операциите на фронтот и нападите со ракети со среден дострел врз руските воени цели.

Според Зеленски, украинските воени претставници добиле предупредување од американските колеги дека Украина би можела да остане без разузнавачки податоци доколку не ги запре нападите врз енергетската инфраструктура. Подоцна, на Киев му било објаснето дека станува збор за технички проблем.

— реклама —

Украинскиот претседател, сепак, ја отфрли можноста нарушувањата во работата на „Старлинк“ да биле последица на технички дефект.

„Не беше технички проблем, туку прашање на волја“, изјави Зеленски за „Фајненшл тајмс“.

На прашањето дали Украина би се согласила да ги запре нападите врз енергетската инфраструктура за да ги подобри односите со Белата куќа, Зеленски одговори дека би прифатил таква можност само доколку САД испорачаат дополнителни ракети-пресретнувачи за противвоздушните системи „Патриот“.

Тој ја оцени таквата испорака како „минимумот“ што Украина би можела да го прифати во замена за прекин на нападите.