Почна 70. издание на Eurovision Song Contest 2026, кое оваа година се одржува во Виена, Австрија, но натпреварот е обележан и со бојкот од неколку европски земји.
Домаќин на музичкиот спектакл е Австрија, а настапите се одржуваат во салата „Винер Штатхале“.
На годинашното издание учествуваат 35 држави, додека Обединетото Кралство, Франција, Германија и Италија имаат директен пласман во финалето како најголеми финансиски поддржувачи на натпреварот.
Сепак, годинава од листата на учесници недостасуваат Исланд, Ирска, Холандија, Словенија и Шпанија, кои решија да го бојкотираат натпреварот.
Причината за бојкотот е протест против израелската воена кампања во Газа и учеството на Израел на Евросонг.
Освен што се повлекоа од натпреварот, Шпанија, Ирска и Словенија одлучија дека нема ни да го пренесуваат Евросонг на националните телевизии.
Од словенечката национална телевизија соопштија дека наместо Евросонг ќе емитуваат филмски циклус со палестински документарни и играни филмови.
Големото финале на Евросонг ќе се одржи на 16 мај.
