Земјотрес со магнитуда од 3,9 степени ја потресе Сицилија, при што во областа на северната падина на Етна се појавиле пукнатини на земјиштето и на локалните сообраќајници.
Земјотресот бил регистриран во саботата во 12:24 часот по локално време, во близина на Пиано Провенцана. Епицентарот бил на околу седум километри западно од Лингваглоса, на длабочина од само еден километар.
По најсилниот потрес, на регионалниот пат Мареневе се појавила пукнатина во асфалтот. Нема информации за повредени лица.
На терен веднаш биле испратени екипи на цивилната заштита, шумарски служби и карабинери. Поради безбедносните ризици, властите наредиле итна евакуација на туристите и целосно затворање на дел од локалните сообраќајници.
Серијата потреси предизвикала и отворање на расцепот Перникана, а очевидци објавиле видеоснимки на кои се гледаат пукнатините во земјата.
Според Националниот институт за геофизика и вулканологија (INGV) од Катанија, по главниот земјотрес биле регистрирани уште три послаби потреси во истото подрачје. Во 12:40 часот бил измерен потрес со магнитуда од 1,4 степени, а во 12:45 и 12:49 часот уште два потреса со магнитуда од 1,1 степен.
Плиткото жариште на земјотресот придонело потресите да бидат почувствувани во поширокото подрачје околу северната падина на Етна.
