Жена која повеќе од една деценија се борела со три животозагрозувачки автоимуни заболувања се вратила на речиси нормален живот откако иновативна клеточна терапија ѝ го „ресетирала“ имунолошкиот систем. Според научниците, станува збор за прв ваков случај во светот со толку брзи и успешни резултати.
Пациентката, лекувана во универзитетска болница во Германија, претходно безуспешно поминала низ девет различни терапии. Нејзината состојба барала секојдневни трансфузии на крв и постојана употреба на лекови за разредување на крвта. По новата терапија, сите три болести се повлекле, а таа веќе 14 месеци е во ремисија без дополнително лекување.
Таа боледувала од автоимуна хемолитичка анемија, ретко нарушување при кое имунитетот ги уништува црвените крвни клетки, како и од имунолошка тромбоцитопенија, што го зголемува ризикот од крварење, и антифосфолипиден синдром, кој предизвикува создавање опасни тромбови. Заедничкиот проблем бил дефект во Б-клетките.
Лекарите примениле CAR-T терапија – метод што веќе се користи во третман на одредени видови рак. Т-клетките на пациентката биле генетски модифицирани за да ги препознаваат и уништуваат оштетените Б-клетки, по што повторно биле внесени во нејзиниот организам.
Ефектот бил брз: само една недела по третманот таа ја примила последната трансфузија, а по две недели веќе можела да се врати на секојдневните активности. Подоцна, кога Б-клетките повторно се обновиле, тие биле здрави, што укажува дека имунолошкиот систем успешно е „ресетиран“.
Иако резултатите се охрабрувачки, експертите предупредуваат дека се потребни дополнителни клинички испитувања за да се утврди долгорочната ефикасност и можноста оваа терапија да се применува кај поширок круг автоимуни заболувања.
