По повод 2 Август – Денот на Републиката, Републичкиот совет за безбедност на сообраќајот на патиштата (РСБСП) упати апел до сите учесници во сообраќајот да бидат внимателни и да ги почитуваат сообраќајните правила за време на претстојниот празничен викенд.
Од РСБСП посочуваат дека се очекува значително зголемување на интензитетот на сообраќајот, особено на патиштата кон туристичките центри како Охрид, Преспа, Дојран, Крушево и Пелинце, како и кон излетничките места и граничните премини.
Советот ги повикува возачите да ја приспособат брзината на движење според ограничувањата, условите на патот и густината на сообраќајот, да не седнуваат зад волан под дејство на алкохол, психоактивни супстанци или во состојба на замор и задолжително да користат сигурносен појас.
Воедно, се препорачува децата до петгодишна возраст да се превезуваат во соодветни детски седишта, а возачите да не користат мобилен телефон и други електронски уреди додека управуваат со возило.
Пред поаѓање на пат, РСБСП советува да се провери техничката исправност на возилото, а при подолги патувања да се прават паузи на секои два часа возење.
Апелот се однесува и на велосипедистите, мотоциклистите, возачите на лесни електрични возила и пешаците, кои исто така треба да се движат внимателно и да ги почитуваат сообраќајните правила.
„Секое одговорно однесување во сообраќајот придонесува за зачувување на човечките животи. Да не дозволиме еден момент на невнимание, пребрзо возење или неодговорна одлука да доведат до несакани последици“, порачуваат од РСБСП.
Од Советот на сите граѓани им го честитаат празникот Илинден и им посакуваат безбедно патување и среќно пристигнување до посакуваната дестинација, со пораката: „Возете одговорно – секој живот е важен.“
