Жителите на Пчиња ја прекинаа блокадата на „Краста“ по договор со Општината, депонијата повторно прима отпад

Депонијата „Краста“ кај Куманово повторно прима отпад откако жителите на селото Пчиња денеска ја прекинаа блокадата по постигнат договор со Општина Куманово и ЈП „Чистота и зеленило“. Пожарот на депонијата е изгаснат, а отпадот е покриен со земја.

Во гаснењето и санацијата учествувале механизација од повеќе претпријатија, општествено одговорни компании и други општини. Активностите ќе продолжат и во наредниот период со цел да се спречат нови пожари и загадување на воздухот.

— реклама —

Градоначалникот на Куманово, Максим Димитриевски, информираше дека по средбата со претставниците на Пчиња е постигнат договор за надминување на проблемите.

— реклама —

„ЈП „Чистота и зеленило“ – Куманово, со помош на Општина Куманово и општествено одговорните компании, продолжува со санација на депонијата „Краста“, унапредување на нејзината состојба и спроведување други мерки предложени од жителите на регионот“, објави Димитриевски.

Директорот на јавното претпријатие, Сашо Томиќ, потврди дека од утрово повторно се одлага отпадот на депонијата. Тој посочи дека по прекинот во изминатите денови се насобрале големи количества смет, особено во поширокото градско подрачје.

— реклама —

Томиќ најави дека екипите ќе работат и во текот на ноќта, почнувајќи од приоритетните зони, со цел што побрзо да се нормализира состојбата.

Претседателот на Месната заедница Пчиња, Александар Илиевски, изјави дека жителите ја прекинуваат блокадата, но остануваат на своите барања и нема да дозволат повторување на пожарите и загадувањето со кои се соочувале во изминатите шест месеци.

Тој најави нова средба за еден месец и континуирано следење на состојбата за да се спречи повторно палење на депонијата и загадување на воздухот.