На 25 октомври годинава повторно ќе преминеме на зимско сметање на времето, кога стрелките на часовникот ќе се поместат еден час наназад. Европската комисија официјално го објави распоредот за промената на времето, согласно важечките правила.
Во ноќта меѓу 24 и 25 октомври, во 03:00 часот стрелките ќе се вратат на 02:00 часот, со што ќе започне зимското сметање на времето.
Според објавениот распоред, летното сметање на времето во 2027 година ќе започне на 28 март, кога стрелките во 02:00 часот ќе се поместат на 03:00 часот, а ќе заврши на 31 октомври.
Сепак, објавувањето на овие датуми не значи дека промената на времето двапати годишно сигурно ќе продолжи до 2031 година. Доколку во меѓувреме Европската Унија донесе нови правила, системот на летно и зимско сметање на времето би можел да биде укинат и порано.
Идејата за укинување на сезонското поместување на часовникот со години е предмет на дебата во Европската Унија. Европскиот парламент во 2019 година поддржа предлог за прекин на поместувањето на часовникот, со план тоа да се реализира во 2021 година. Сепак, примената беше одложена бидејќи земјите-членки не успеаја да постигнат договор дали треба да се задржи летното или зимското сметање на времето.
Според важечкото правило што го применува и Македонија, летното сметање на времето започнува во последниот викенд од март, кога стрелките во 02:00 часот се поместуваат на 03:00 часот. Зимското сметање започнува во последниот викенд од октомври, кога во 03:00 часот стрелките се враќаат на 02:00 часот.
