Жителите на „Јане Сандански“ ја поддржуваат најавената реконструкција на улицата. Тие со граѓански собир денеска изразија незадоволство од реакциите на граѓанската асоцијација „Охрид СОС“ и барањето да се стопира проектот за реконструкција на улицата. Велат дека веќе 30 години го чекаат овој проект и не знаат кому му одговара ова да се стопира. Додаваат дека најголем проблем им е водоводната и канализациона мрежа, стара повеќе од пет децении.
– Ние овој проект го бараме веќе 30 години. Не се работи само за обновување на дрворедот, бараме реконструкција на водоводна мрежа, тротоарите да се нивелираат, да има велосипедска патека. Добро е што конечно ќе се реализира овој проект. Улицата што е бренд за Охрид жалосно е да се гледа во оваа состојба, рече Илија Џепароски, жител на улицата.
По однос на сечењето на дрвата велат дека секојдневно се соочуваат со наткренатите тротоари од излезените корења, што им претсавуваат проблем во движењето особено на повозрасните, лицата со посебни потреби и мајките со деца. Апелираат да се засадат нови, но со коренов систем кој нема да бида површински.
– Има многу проблеми, а најголем е водоводната инсталација градена некаде 56/57-ма година. На секој втор месец има по некоја пукнатина, се прават штети, има дел од жителите кои имаат тужено и ги имаат добиено делата. Да се смени водовод и канализација, тротоарите да се направат, а за дрвата, ќе се зададат нови, со подлабок корен, овие прават голем проблем, коренот им е површински па подигнат е тротоарот. Треба да се одберат дрва на кои коренот ќе оди надолу, вели Јове Јованоски, еден од постарите жители на оваа улица.
Се жалат дека при поголеми врнежи од дожд водата им влегува во дворовите и уште еднаш потенцираа дека жално е да се стопира нешто убаво што се сака да се направи.
Инаку, утринава започна сечењето и отстранување на дрворедот на улицата „Јане Сандански“ како дел од најавените подготвителни активности за комплетна реконструкција на една од поважните сообраќајни артерии на градот и промена на водоводната азбестна линија. Ќе се реконструира потегот од крстосницата со булеварот „Туристичка“ до кружниот тек кај Болнички комплекс.
