Глобалната побарувачка за злато продолжува да расте, а во првите шест месеци од годинава достигнала 2.522 тони, што е зголемување од 2 отсто во споредба со истиот период лани. Вкупната вредност на побаруваното злато се проценува на околу 380 милијарди долари, покажуваат податоците на Светскиот совет за злато.
Еден од главните двигатели на пазарот останува интересот за физичко злато. Само во вториот квартал побарувачката за златни прачки и монети достигнала 307 тони.
Централните банки продолжуваат да бидат значаен купувач. Во периодот април-јуни тие набавиле дополнителни 289 тони злато, со што и натаму силно влијаат врз глобалниот пазар.
Од друга страна, фондовите со кои се тргува на берза и кои инвестираат во злато бележат пад на резервите. Во вториот квартал количината на злато што ја поседуваат овие фондови се намалила за 45 тони. Сепак, вкупната вредност на нивните златни резерви достигнала околу 530 милијарди долари.
Цената на златото во текот на јули главно се движела околу 4.027 долари за унца, без значителни промени. Во август, сепак, следуваше нов раст од повеќе од 200 долари, па унцата достигна цена од околу 4.260 до 4.270 долари.
И покрај најновото поскапување, златото сè уште е под рекордните нивоа од почетокот на годината. Во последните шест месеци цената е пониска за околу 15 до 16 отсто.
На подолг рок, трендот е спротивен. Во споредба со август минатата година, златото е поскапо за речиси 25 отсто, додека во последните пет години неговата цена се зголемила за околу 146 отсто.
