Златото продолжува да расте и на почетокот на оваа недела, поттикнато од послабите податоци за малопродажбата во САД и падот на доларот. Благородниот метал во еден момент поскапе за 0,9 отсто, а потоа делумно го намали растот и се движеше околу 4.400 долари за унца.
Минатата недела златото ја заврши со раст од речиси еден отсто, продолжувајќи го двонеделниот позитивен тренд. Најновите економски податоци од САД покажаа пад на расположението на потрошувачите и на малопродажбата, што ги намали очекувањата за скорешно зголемување на каматните стапки. Повисоките камати обично се неповолни за златото бидејќи металот не носи каматен принос.
Американскиот долар во понеделникот ослабе за 0,2 отсто, што дополнително го поддржа златото бидејќи го направи поевтино за купувачите кои користат други валути.
„Пазарите не веруваат дека Фед во блиска иднина ќе заземе јастребски став“, изјави Џастин Лин, аналитичар во „Global X ETFs“. Пазарите во моментов ја проценуваат веројатноста за зголемување на каматните стапки на септемврискиот состанок на Фед на помалку од една третина, додека на почетокот на месецот таа беше над 70 отсто.
Неизвесноста околу глобалното снабдување со енергија, сепак, останува фактор што би можел да влијае врз монетарната политика и цените на благородните метали. Кон крајот на минатата недела беа пријавени напади врз неколку бродови во Ормускиот Теснец, додека САД најавија нови мерки насочени кон иранската економија.
Растот на златото над границата од 4.000 долари за унца повторно го зголеми интересот на инвеститорите, а дополнителна поддршка доаѓа и од купувањата на централните банки, особено од Кина.
„На златото ќе му биде потребен позначаен пробив над 4.400 долари за да потврди дека позитивниот моментум има простор за продолжување“, оцени Лин.
Инвеститорите сега го очекуваат записникот од јулскиот состанок на Фед, кој треба да биде објавен в среда и да даде дополнителни сигнали за идната политика на американската централна банка.
Во понеделникот наутро спот-цената на златото беше повисока за 0,4 отсто и изнесуваше 4.394,38 долари за унца. Среброто поскапе за 1,6 отсто, на 65,73 долари за унца, додека пораснаа и цените на платината и паладиумот.
