Здружението на новинарите на Македонија (ЗНМ), поттикнато, од, како што велат, некои неодговорни објави, пред сè, на социјалните мрежи, апелира да не се стигматизираат новинарите и медиумските работници кои се заразени со коронавирус или за кои постои сомнеж дека се носители на вирусот.
„Потсетуваме дека говорот на омраза и повиците за насилство се казниви дела, без разлика дали тие се присутни на традиционалните медиуми или на социјалните мрежи“, се наведува во соопштението на ЗНМ.
Оттаму предупредуваат дека поради природата на професијата, новинарите се повеќе изложени на контакти со луѓе, а тоа ги прави и да бидат повеќе ранливи за зараза со коронавирусот.
„Од апсолутна важност за нивната лична безбедност и безбедноста на лицата со кои се во контакт е да се обезбедат услови и средства за работа од страна на сопствениците и менаџерите на медиумите преку кои ќе се намали ризикот на зараза“, нагласуваат од новинарското здружение.
Во врска со информацијата дека уредникот на националната телевизија „Канал 5“, Гоце Михајлоски, е позитивен на коронавирусот, од ЗНМ на колегата му посакуваат брзо закрепнување и набргу да се врати на своето работно место.
фото: Архива
