Сатиричната емисија „24 минути со Зоран Кесиќ“ повеќе нема да се емитува на телевизијата Нова С. До прекинот на долгогодишната соработка доаѓа откако екипата на емисијата и новото раководство на „Adria News Network“ (ANN), во чија сопственост е телевизијата, не постигнале договор за продолжување на емитувањето.
Одлуката следува по промената на управувањето со ANN, откако компанијата ја презеде португалскиот инвестициски фонд „Alpac Capital“. Извршниот директор на фондот, Педро Варгас Давид, во средината на август официјално беше запишан како директор на компаниите во рамките на ANN.
Новата сезона на „24 минути“ требаше да започне на 19 септември. Кесиќ на 2 септември соопшти дека неговата екипа уште во јуни го потпишала договорот за новата сезона, но дека потпис од другата страна немало.
„Но, од другата (португалска) страна, што би рекла Амалија – ‘Silencio’. Ниту пишуваат, ниту се јавуваат“, напиша тогаш Кесиќ.
Од ANN сега велат дека молкот не бил знак на незаинтересираност, туку дека новото раководство морало да ги анализира обврските наследени од претходниот сопственик.
Според нив, клучната причина поради која договорот нема да биде продолжен е цената на продукцијата. Од компанијата тврдат дека „24 минути“ била една од најскапите ставки во програмската шема на Нова С.
„По анализата беше утврдено дека емисијата претставувала една од најскапите ставки во програмската шема на каналот, со вкупен годишен трошок поголем од половина милион евра за помалку од 30 часа програма годишно“, соопштија од ANN.
Оттаму нагласуваат дека сумата не се однесувала само на хонорарот на Кесиќ, туку на целокупната продукција во студијата на телевизијата, користењето на опремата и ангажманот на вработените. Според нивната проценка, комерцијалниот ефект на емисијата бил „маргинален“, поради што трошокот не можел да биде оправдан.
Екипата на „24 минути“, пак, уште пред конечната одлука навестуваше дека постои можност соработката да заврши. Авторите оценија дека постојат „сите логични причини“ една од најгледаните и најпрепознатливи емисии на телевизијата да продолжи, но дека се подготвени и за „нелогичните причини“.
„Нелогични се времињата, нелогични се некои моќни луѓе, логично е нелогичното да стане логично. И не би било првпат во медиумите да сведочиме на алхемиски процес на претворање нешто во ништо“, порача екипата.
ANN реагираше и на јавното говорење на Кесиќ и неговата екипа додека анализата на договорот сè уште траела. Од компанијата велат дека ја почитуваат нивната слобода да зборуваат јавно, но дека јавната кампања не можела да ги промени финансиските показатели ниту конечната одлука.
Новото раководство истовремено тврди дека одлуката не е резултат на политички притисок и дека во Нова С одлуките ќе се носат „исклучиво на професионални и економски рационални основи“.
Со тоа, летната пауза за „24 минути со Зоран Кесиќ“ нема да заврши со најавеното враќање на 19 септември. Кесиќ за Н1 најави дека за одлуката подетално ќе се огласи во наредните денови.
