Миле Лефков, член на Извршниот комитет и пратеник на ВМРО-ДПМНЕ, повторно го обвини обвинителот Ислам Абази дека го заштитил поранешниот министер за здравство Венко Филипче во предметот за модуларните болници.
Лефков тврди дека предметот и доказите со години биле чувани во фиоки кај обвинителките Вилма Русковска и Елизабета Јосифовска, а потоа, според него, Абази ја довршил заштитата на Филипче.
Како еден од клучните аргументи, Лефков го посочува Артан Етеми, поранешен економски директор на тетовската болница, кој беше осуден на една и пол година затвор во предметот за модуларната болница.
Според Лефков, Етеми до последен момент се противел на приемот и пуштањето во употреба на модуларната болница во Тетово.
Од ВМРО-ДПМНЕ тврдат дека модуларните болници биле набавени и поставени како стоки, а не како објекти за здравствена дејност, и дека биле изработени според техничка спецификација на лице поставено од тогашниот министер Филипче.
Лефков дополнително наведува дека повеќе директори на болници низ државата се противеле на поставувањето на модуларните болници поради, како што тврди, недостиг од приклучоци, надзор и средства за дополнителни работи.
Тој посочува и дека Светска банка барала одобренија за поставување и употреба, како и изводи од Катастар, со цел да се потврди одржливоста на проектот.
Според тврдењето на Лефков, ниту општините ниту Министерството за транспорт и врски не можеле да издадат такви одобренија затоа што не била испочитувана процедурата од Законот за градење.
Од ВМРО-ДПМНЕ велат и дека Катастарот одбивал упис на модуларните болници затоа што биле набавени како стоки и немало извештај од надзор согласно член 74 од Законот за градење.
Лефков тврди дека, и покрај противењето од тетовската болница, модуларниот објект бил пуштен во употреба со одлука на Министерството за здравство и тогашниот министер Венко Филипче.
„Клучен факт е дека во моментот на критичниот настан, модуларната болница во Тетово нема одобрение ниту за поставување, ниту за употреба од Министерството за здравство“, вели Лефков.
Тој додава дека објектот изгорел за неполни две минути и тврди дека за тоа постојат снимки, документи и докази кои, според него, Обвинителството не ги презентирало.
„Зошто ОЈО ГОКК го заштити Филипче? Зошто обвинетите, поранешни директори на тетовската болница, рекоа дека вистинскиот виновник треба да седи до нив на обвинителната клупа, а тоа е Венко Филипче?“, прашува Лефков.
