Зулфиќар Зејнула стана нов министер без ресор во Владата

Зулфиќар Зејнула е избран за министер без ресор во Владата, откако Собранието денеска му даде доверба со 67 гласа „за“. Против неговото именување гласаа 13 пратеници, а воздржани немаше.

— реклама —

Со ова именување официјално завршува реконструкцијата на Владата, иако сѐ уште не е соопштено кој ресор или кои надлежности ќе му бидат доверени.

— реклама —

Зејнула е лидер на Демократската партија на Турците, која на 10 јули склучи договор за политичка соработка со ВМРО-ДПМНЕ и стана дел од владејачката коалиција „Твоја Македонија“. По приклучувањето на оваа партија, пратеничката група предводена од ВМРО-ДПМНЕ брои 59 пратеници.

— реклама —

Во своето обраќање пред пратениците, премиерот Христијан Мицкоски истакна дека предлогот за Зејнула произлегува од определбата за пошироко политичко партнерство и заедничка одговорност во работењето на Владата. Тој нагласи дека институциите треба да бидат отворени за сите кои можат да придонесат со своето знаење и искуство, независно од нивната политичка или етничка припадност.

— реклама —

Новиот министер без ресор во периодот од 2021 до 2024 година ја извршуваше функцијата заменик-директор на Дирекцијата за заштита и спасување. Претходно бил советник во Општина Гостивар, а работел и во правниот сектор на Демократската партија на Турците. По образование е дипломиран криминалист на Факултетот за безбедност при Универзитетот „Свети Климент Охридски“ во Битола.