На денот кога Есма Реџепова-Теодосиевска ќе го прославеше својот 83. роденден, нејзиниот син Симеон Атанасов јавно го отвори прашањето за судбината на наследството што го остави легендарната пејачка.
Атанасов упати критики до институциите поради, како што вели, долгогодишното молчење и негрижа.
„Денес ја потсетуваме државата дека постоеше Есма Реџепова-Теодосиевска. Жена која ја претставуваше Македонија низ целиот свет, која одгледа и воспита 48 деца и целиот свој живот, труд и музичко богатство го остави на оваа држава“, напиша тој.
Според Атанасов, веќе 10 години нема доволно грижа и јасен одговор за нејзиното наследство. Тој посочува дека тој и другите деца не биле дел од тестаментот и повика медиумите јавно да прашаат што се случува со имотот и наследството на Есма.
„Молкот веќе не е опција. Ако ја заборавиме Есма, тогаш сме се заборавиле и самите себе“, порача Атанасов.
Есма е родена на 8 август 1943 година во Скопје, а почина на 11 декември 2016 година. Во кариерата подолга од пет децении одржа илјадници концерти низ светот, а повеќе од 2.000 од нив биле со хуманитарен карактер.
Покрај музиката, Есма беше позната и по хуманитарната работа. Таа и нејзиниот сопруг Стево Теодосиевски се грижеле за 48 деца. Во 2013 година Есма беше прогласена за национален уметник, а истата година ја претставуваше Македонија на Евровизија со Влатко Лозаноски.
По нејзината смрт, во јавноста повеќепати беше отворено прашањето за состојбата со нејзиниот дом и музеј.
