Симеон Атанасов, едно од 48-те деца што ги одгледала Есма Реџепова, реагираше на коментарите во јавноста во кои децата се обвинуваат за состојбата со куќата и наследството на легендарната пејачка.
Во објава на Фејсбук, Атанасов појаснува дека по смртта на Есма, децата што таа ги одгледала немале пристап до куќата, ниту можност да одлучуваат за имотот.
„Ние не сме нејзини биолошки наследници и немавме право да одлучуваме за имотот. Но тоа не значи дека не сме биле нејзини деца. Напротив. Таа беше нашата мајка по сè што направи за нас“, наведува Атанасов.
Тој реагира на прашањата што во јавноста се упатуваат кон 48-те деца за тоа што направиле за Есма и вели дека тие направиле сè што можеле како нејзини деца, но не биле во позиција да управуваат со нејзиниот имот.
Атанасов во објавата поставува прашања за тоа кој имал клуч и пристап до куќата, кој одлучувал за имотот и каде се предметите што се наоѓале во неа.
Според него, одговорноста за наследството треба да се бара кај оние што имале право и можност да постапуваат со имотот, а не кај децата што Есма ги одгледала.
„Не ги обвинувајте децата за нешто за кое немале ниту пристап ниту моќ да одлучуваат“, порача Атанасов, додавајќи дека за него Есма засекогаш ќе остане „наша мајка, наша Кралица и наша легенда“.
