101 неправилност при контрола на товарни возила, 25 возила исклучени од сообраќај

Во акциската контрола на товарни возила спроведена на 28 октомври на територијата на Македонија, полицијата утврдила 101 неправилност, поради што од сообраќај биле исклучени 25 возила.

— реклама —

Контролата ја спровел Секторот за сообраќајни работи при Министерството за внатрешни работи, во периодот од 9 до 14 часот. Биле опфатени вкупно 781 возило, од кои 92 биле упатени на технички преглед.

— реклама —

Проверките биле насочени кон откривање претовар, неправилно сместен и необезбеден товар, технички неисправни возила и неправилен превоз на лица. Биле контролирани и возила што се вклучуваат во сообраќај од земјени патишта, градилишта и други површини, при што нанесуваат кал на коловозот.

— реклама —

Во рамките на акцијата биле евидентирани и три случаи на кривичното дело „безобѕирно управување со моторно возило“, согласно член 297-а од Кривичниот законик. Дополнително, полицијата констатирала уште 219 прекршоци од друг вид.

За сите утврдени неправилности се преземени соодветни законски мерки. Од МВР најавуваат продолжување на акциските контроли и апелираат до возачите и превозниците да ја почитуваат регулативата, да ја одржуваат техничката исправност на возилата и правилно да го сместуваат и обезбедуваат товарот.