12-годишно момче и 14-годишно девојче нападнати во Полска затоа што зборувале на украински

Во полскиот град Бидгошч, 14-годишно девојче и 12-годишно момче од Украина биле нападнати затоа што меѓусебно разговарале на украински јазик. За случајот извести Генералниот конзулат на Украина во Гдањск, пренесува „European Pravda“.

— реклама —

Според дипломатската мисија, децата најпрво биле вербално нападнати од маж и жена, кои им упатувале навреди, пцовки и закани мотивирани од национална нетрпеливост. Ситуацијата потоа прераснала во физички напад.

Од конзулатот наведуваат дека на едното дете му била завртена раката, му била скршена играчка, а кон момчето биле фрлани парчиња од скршениот предмет, при што се здобило со гребаници.

— реклама —

Децата немаат потешки физички повреди, но, според конзулатот, претрпеле сериозен емоционален стрес. Случајот бил пријавен во полиција, која трага по лицата вмешани во нападот. Конзулатот е во контакт со мајката на децата и го следи случајот.

— реклама —

„Остро го осудуваме секој облик на ксенофобија“, порача дипломатската мисија, додавајќи дека безбедноста на Украинците и спречувањето на нетрпеливоста ќе бидат меѓу темите на претстојниот состанок со претставници на Поморското Војводство, градоначалници и полициски раководители.

Инцидентот се случува во период кога во Полска се регистрираат случаи на напади врз украински државјани, но и зголемени политички тензии околу нивниот престој во земјата.

На почетокот на август, 39-годишен маж во Краков се предал во полиција откако вербално нападнал двајца украински државјани. Во меѓувреме, пратеникот во Европскиот парламент Тобијаш Бохенски од партијата „Право и правда“ најави дека неговата партија, доколку дојде на власт, би се залагала за депортација на воено способни Украинци кои во Полска не се легално вработени. Полското Министерство за внатрешни работи ваквите најави ги оцени како популизам.