136 ученици во Македонија имале самоубиствени мисли или мисли за самоповредување поради сајбернасилство

Истражување спроведено во 32 основни и средни училишта во Македонија покажува дека 136 ученици имале самоубиствени мисли или мисли за самоповредување додека биле жртви на сајбернасилство. Тоа се 8,4 отсто од вкупно 1.623 ученици опфатени со истражувањето, финансирано од Министерството за образование и наука. Дополнително, 183 ученици, односно 11,3 отсто, се соочиле со социјална изолација и повлекување, објави САКАМДАКАЖАМ.МК.

Истражувањето го спровеле универзитетски професори од Битола, опфаќајќи по 16 основни и средни училишта од сите плански региони во државата.

— реклама —

Според резултатите, 23,1 отсто од испитаниците барем еднаш биле жртви на сајбернасилство. Најчеста форма е вербалното насилство преку навредливи и понижувачки пораки и коментари, за што се изјасниле 77,6 отсто од учениците.

„Учениците изјавиле дека најчесто сајбернасилството го вршат од забава, што укажува на недоволна свесност за последиците што може да ги предизвика врз психосоцијалниот живот на децата“, истакна вонредната професорка Ивона Шушак-Лозановска од Правниот факултет во Битола.

— реклама —

Како мотиви за сајбернасилство учениците ги навеле љубомората, одмаздата, досадата, забавата и желбата за моќ и контрола. Истражувањето открива и случаи на злоупотреба на вештачката интелигенција, како и споделување фотографии и видеа, меѓу кои и со интимна содржина.

— реклама —

Околу 34 отсто од учениците биле сведоци на сајбернасилство во својата училишна средина, додека приближно 49 отсто не знаеле дали во нивното училиште се случило вакво насилство.

Редовната професорка Ангелина Станојоска посочи дека дел од учениците не го препознаваат насилното однесување во дигиталниот простор како насилство, туку како вообичаен начин на комуникација. Таа нагласи дека е потребна дополнителна едукација за учениците да можат да ги препознаат ваквите појави и да побараат заштита.

Според истражувањето, учениците најголема доверба сè уште имаат во најблиските, особено во родителите, на кои први им се доверуваат кога ќе се соочат со вакви ситуации.

Истражувањето го спровеле професорите Ангелина Станојоска, Ице Илијевски, Ивона Шушак-Лозановска, Благој Неновски и Ана Џима.