Министерството за здравство соопшти дека ќе спроведе темелна проверка на случајот на Станка Михајлова од струмичкото село Баница, која по породување со царски рез во Клиничката болница во Штип останала неподвижна и се движи со инвалидска количка.
Случајот деновиве предизвика силни реакции во јавноста, откако нејзиниот свекор Велибран Стојанов преку видеа во живо од пред болниците во Струмица и Штип побара помош од министерот за здравство, Сашо Клековски. Тој тврдеше дека лекар од струмичката болница му рекол дека Станка ќе остане парализирана, што било причина јавно да проговори за нејзината здравствена состојба.
Од Министерството информираат дека, по налог на министерот, Државниот санитарен и здравствен инспекторат спроведува вонреден инспекциски надзор во трите здравствени установи каде што пациентката била лекувана – Општата болница во Струмица, Клиничката болница во Штип и Универзитетската клиника за неврологија во Скопје.
Во наредните денови инспекторите треба да ја приберат целокупната медицинска документација, по што ќе биде изготвен стручен извештај. Доколку се утврдат пропусти во лекувањето, Министерството најавува дека ќе бидат преземени соодветни мерки во согласност со законските прописи.
Во соопштението се нагласува дека во текот на постапката ќе бидат почитувани достоинството, приватноста и правото на заштита на личните и медицинските податоци на пациентката.
Како што пренесува „Слободен печат“ Станка во изминатиот месец поминала повеќе од 27 лекарски прегледи без да биде утврдена причината за параплегијата. Тие тврдат и дека, иако по царскиот рез била отпуштена од болница со оценка дека е во добра општа здравствена состојба, уште при заминувањето не можела самостојно да оди.
Министерството потсетува дека секој пациент има право на безбедна, квалитетна и навремена здравствена заштита, како и на целосни информации за својата здравствена состојба. Воедно, апелира јавноста да се воздржи од шпекулации додека трае инспекциската постапка, а евентуалната одговорност да се утврдува исклучиво врз основа на резултатите од стручниот надзор.
