23-годишен државјанин на Србија е уапсен во Солун, осомничен е дека предводел група за кражба на луксузни автомобили.

Во полициска акција во Солун, спроведена на 30 септември, биле приведени шест лица, меѓу кои 23-годишен државјанин на Србија, баран со Интерполова црвена потерница, и 40-годишен Србин, кого истражителите во Србија го сомничат дека бил еден од организаторите на криминална група за кражба и препродажба на луксузни автомобили.

Акцијата била спроведена во угостителски објект на новото солунско крајбрежје. Припадници на грчката полиција влегле во локалот и ја привеле групата мажи. Покрај двајцата, приведени биле уште тројца државјани на Србија на возраст од 24, 24 и 25 години, како и 55-годишен државјанин на Чешка.

— реклама —

При проверката, грчката полиција кај повеќе лица пронашла документи за кои постои сомнение дека се фалсификувани. Дваесет и тригодишникот покажал српски пасош со својата фотографија, но издаден на друго име. Кај 25-годишен српски државјанин била пронајдена хрватска лична карта на име на друго лице, за која исто така постои сомнение дека е фалсификувана.

Особено внимание кај истражителите предизвикал 40-годишниот Србин. Кај него биле пронајдени украински пасош на друго име, украинска возачка дозвола и словачка лична карта. Според грчките извори, со украинскиот пасош тој влегол во Грција на 27 септември, само три дена пред акцијата.

Српските медиуми објавија дека станува збор за М. Т., против кого во Србија веќе се води постапка за организиран криминал.

— реклама —

Српското Министерство за внатрешни работи во јануари 2024 година соопштило дека во акција во Белград, Шабац, Нови Сад и Сремска Митровица биле уапсени 11 лица, меѓу кои и М. Т. Тој, заедно со уште едно лице, бил посочен како можен организатор на криминалната група, додека со кривичната пријава биле опфатени уште 14 лица.

Според тогашните сомневања на полицијата, групата од 2020 до 2024 година набавувала понови и луксузни автомобили украдени во земји од Европската Унија. Возилата биле внесувани во Србија, каде што во гаражи и автосервиси им биле менувани броевите на шасијата и моторите.

— реклама —

Потоа, според истрагата, автомобилите со фалсификувана документација биле продавани во Србија и други европски земји како легално стекнати возила. Српското МВР тогаш проценило дека групата на овој начин стекнала противправна имотна корист од повеќе милиони евра.

При претресите биле пронајдени автомобили и делови за возила, електронска опрема што може да се користи за стартување и кражба на луксузни автомобили, неколку стотици илјади евра и поголема количина златен накит.

Главната цел на солунската акција, сепак, бил 23-годишниот Србин, по кого била распишана меѓународна потерница поради грабеж во Белград во 2025 година. Според документите на српските власти што ги пренесуваат грчките медиуми, грабежот бил поврзан со криптовалути во вредност од над 50.000 евра.

— реклама —

Грчката полиција проверувала и информации дека неговото доаѓање во Солун можело да биде поврзано со подготовка на ново кривично дело. Дел од грчките медиуми, повикувајќи се на полициски извори, објавиле дека се истражувала можноста за подготовка на убиство на член на спротивставена криминална група. Ова сомнение засега не е потврдено со обвинение.

Дваесет и тригодишниот Србин ден по акцијата се појавил пред грчкиот обвинител и се согласил да биде екстрадиран во Србија.