Пред 25 години, на 10 август 2001 година, кај месноста Љуботенски Бачила се случи една од најтешките трагедии во конфликтот во 2001 година, во која животот го загубија осум припадници на резервниот состав на Армијата, а уште осуммина беа повредени.
Несреќата се случила околу 8 часот наутро, кога воен камион на АРМ, кој превезувал муниција, налетал на две противтенковски мини поставени на патот, на околу пет километри од селото Љуботен. Силната експлозија била проследена со повеќечасовна престрелка меѓу припадници на ОНА и втората чета на Третиот баталјон, во чии редови биле и загинатите припадници.
Во текот на борбите бил извршен и воздушен напад со хеликоптери Ми-24, по што формацијата на ОНА се повлекла.
Во трагичниот настан загинаа Томе Бадаревски (33), Марјанчо Бошковски (28), Томе Димовски (37), Ивица Златевски (24), Бранко Јанев (36), Раде Јанковски (32), Томислав Настевски (27) и Гоце Чанкуловски (39).
По повод 25-годишнината од трагедијата, денес делегација од Генералштабот на Армијата и Министерството за одбрана, предводена од началникот на Генералштабот, генерал-мајор Сашко Лафчиски, ќе им оддаде почит на загинатите бранители.
Во рамките на одбележувањето ќе бидат положени цвеќе и венци на повеќе спомен-обележја посветени на загинатите припадници.
Првата активност е предвидена во 8 часот кај спомен-обележјето на паднатиот бранител Томислав Настевски во Општина Ѓорче Петров. Во 8:30 часот ќе биде оддадена почит кај споменикот на паднатите бранители во селото Волково.
Во 10 часот делегацијата ќе положи венци кај споменикот на загинатите бранители во селото Љубанци, додека во 12 часот ќе биде положено цвеќе и кај спомен-плочата во касарната „Илинден“.
