Со комеморативен настан и оддавање почит пред спомен-обележјата, Општина Ѓорче Петров денеска ја одбележа 25-годишнината од загинувањето на македонските бранители кај Љуботенски Бачила.
На комеморацијата присуствуваа делегација од Општината, предводена од градоначалникот Александар Стојкоски, претставници на државните институции, припадници на Армијата и безбедносните сили, семејства на загинатите бранители и бројни граѓани.
Обраќајќи се пред споменикот во Волково, Стојкоски порача дека 10 август е ден што не смее да биде заборавен и ден кога Македонија се сеќава на оние што ги положиле животите за татковината.
„Повторно сме собрани на ова место на сеќавањето, пред споменикот што засекогаш сведочи за храброста, пожртвуваноста и љубовта кон татковината на нашите сожители Раде Јанковски, Ивица Златевски, Томе Димовски, Томислав Настевски и Ацо Ангеловски, како и на нашите браќа Томе Бадаровски, Гоце Чанкуловски, Бранко Јанев и Маријанчо Бошковски“, рече Стојкоски.
Тој упати порака и до семејствата на загинатите, истакнувајќи дека нивната болка е и болка на целото општество.
„Ниту еден збор не може да ја надомести загубата на син, сопруг, брат или татко. Но, постои нешто што како држава, општина и како народ сме должни да ви го ветиме – нивните имиња никогаш нема да исчезнат од нашата колективна меморија“, порача градоначалникот.
Стојкоски ја нагласи и улогата на припадниците на Армијата и безбедносните сили во зачувувањето на слободата и суверенитетот.
„Македонскиот народ отсекогаш знаел дека слободата не е подарок, туку дека таа се заслужува, се брани и се чува. Нашите бранители тоа најдобро го покажаа“, додаде тој.
На крајот од комеморацијата беше упатен повик споменот на загинатите бранители и нивната жртва трајно да се зачуваат во колективната меморија и да се пренесуваат на идните генерации.
