26 случаи на западнонилска треска во Македонија, ИЈЗ смирува: „Нема место за паника, но граѓаните да бидат внимателни“

Во Македонија досега се регистрирани 26 случаи на западнонилска треска, од кои 25 се во Скопје и еден во Велес. Најголем дел од заболените се лица постари од 60 години, поради што повозрасната популација се смета за особено ризична.

— реклама —

Директорот на Институтот за јавно здравје, Андовски, апелира граѓаните да бидат внимателни, но да немаат причина за паника. ЦЈЗ Скопје прогласи епидемија во повеќе скопски општини и населени места, меѓу кои Кисела Вода, Гази Баба, Аеродром, Бутел и Илинден, како и Драчево, Пржино, Долно Лисиче, Кадино и Јурумлери.

— реклама —

Досега е регистриран и еден смртен случај како последица на компликации поврзани со инфекцијата.

Надлежните препорачуваат граѓаните да преземат мерки за лична заштита од комарци. Се советува редовна употреба на репеленти, носење светла и покриена облека, како и избегнување подолг престој на отворено во периодите кога комарците се најактивни.

— реклама —

Дополнително, се препорачува отстранување на застоената вода од дворовите и околината, бидејќи таквите места се погодни за размножување на комарците.

Состојбата, според надлежните, се следи континуирано, а јавноста ќе биде информирана за новите податоци и евентуалните дополнителни мерки.