Западнонилската треска се шири кон северот на Европа, пријавени 1.715 случаи

Европа се соочува со најинтензивната сезона на западнонилска треска досега, а заразата се проширува и во делови од континентот што претходно не биле погодени. Европскиот центар за спречување и контрола на болести (ЕЦДЦ) предупредува дека болеста, која се пренесува преку убод од заразени комарци, сè повеќе се шири и кон северот на Европа.

Според податоците заклучно со 7 октомври, земјите од Европската Унија пријавиле рекордни 1.715 случаи на локално стекната инфекција кај луѓето, а од болеста починале 130 лица.

— реклама —

Наодите кај луѓето и животните во Белгија и Холандија потврдуваат дека западнонилската треска се шири посеверно отколку претходно, а од ЕЦДЦ очекуваат овој тренд да продолжи. Холандија годинава пријавила 59 случаи, додека Белгија регистрирала 15, што се воедно и првите локално стекнати инфекции кај луѓето во таа земја.

Најпогодена е Италија со 748 пријавени случаи. Следуваат Грција со 445 и Франција со 144 случаи, што претставува рекорден број за двете земји.

— реклама —

Селин Госнер од ЕЦДЦ посочува дека ширењето на западнонилската треска ја покажува потребата од соработка меѓу различни сектори. Болеста се пренесува меѓу комарците и птиците, а може да ги погоди луѓето и коњите, поради што ниту еден сектор не може самостојно да се справи со ризикот.

И покрај зголемувањето на бројот на заразени, од ЕЦДЦ нагласуваат дека тежината на болеста не е зголемена. Бројот на починати, хоспитализирани и пациенти со невролошки симптоми останува на нивото забележано во изминатата деценија.

— реклама —

Поради ширењето на западнонилската треска и зголемувањето на бројот на луѓе изложени на ризик, ЕЦДЦ повикува на подобра подготовка за следните сезони. Оле Хојер, раководител на оддел во центарот, предупредува дека ширењето на болеста тешко може да се предвиди бидејќи значително се разликува од година во година.

Тој нагласува дека раното откривање, поголемата информираност и ефикасната контрола на комарците можат да помогнат во намалувањето на последиците од болеста додека таа се проширува на нови подрачја.

За западнонилската треска не постои вакцина за луѓето, а лекувањето се заснова на ублажување на симптомите и болничка нега кај потешките случаи.

Ризикот од заразување може да се намали со употреба на средства против комарци, носење облека со долги ракави и ногавици, како и поставување мрежи на прозорците или користење клима-уреди. Заштитата е особено важна за повозрасните лица и луѓето со ослабен имунитет, кај кои постои поголем ризик од развој на тешка форма на болеста.