Скопје и понатаму има најголем број регистрирани случаи на западнонилска треска, но заболувањето е евидентирано и во уште неколку градови низ Македонија. Според податоците на Институтот за јавно здравје, заклучно со 22 септември во земјата се регистрирани вкупно 70 случаи.
Од нив, 65 случаи се потврдени, а пет се класифицирани како веројатни, согласно дефиницијата на случај.
Најголем дел од заболените се од Скопје, каде што се евидентирани 63 случаи. Во Велес има три случаи, а по еден случај е регистриран во Куманово, Свети Николе и Кавадарци. Воедно, ИЈЗ го регистрирал и првиот случај на западнонилска треска во Тетово.
Од вкупниот број, 69 случаи се автохтони. Еден случај е поврзан со патување во Грција, но според податоците, инкубацискиот период опфаќа и престој во Македонија.
Меѓу заболените преовладуваат мажите – 52 случаи или 74,3 проценти, додека кај жените се регистрирани 18 случаи, односно 25,7 проценти.
Најзастапена е возрасната група над 60 години, во која се регистрирани 57 случаи или 81,4 проценти од вкупниот број. Седум случаи се кај лица на возраст од 50 до 59 години, два кај лица од 40 до 49 години, еден кај лице од 30 до 39 години и три случаи кај лица на возраст од 20 до 29 години.
Просечната возраст на заболените изнесува 66,5 години.
