Основниот суд во Гостивар им определи 30-дневен притвор на тројцата осомничени во истрагата за загадувањето на водата за пиење во градот, прифаќајќи го предлогот на Основното јавно обвинителство Гостивар.
Мерката притвор е определена за вршителката на должност директор на ЈП „Комуналец“ – Гостивар, Артана Асани, раководителот на Одделението за водовод, Вадедин Даути, и техничкиот директор на претпријатието, Леон Мезини.
Обвинителството ги товари за тешки дела против животната средина и природата, поврзани со загадување на вода за пиење, кривично дело за кое е предвидена затворска казна од најмалку четири години.
Истрагата беше отворена по пријава за загадување на водата во Гостивар, по што беа извршени проверки на терен, обезбедена документација од ЈП „Комуналец“ и земени мостри од повеќе локации. Анализите покажаа присуство на колиформни бактерии на една од испитуваните точки, како и зголемена концентрација на хлор во еден од примероците.
Од Обвинителството претходно најавија дека истрагата е во тек и дека не е исклучена можноста таа да биде проширена и со други лица доколку бидат обезбедени дополнителни докази.
