Жителите на Гостивар ќе бидат ослободени од плаќање на сметките за вода за пиење и собирање отпад за август. Одлуката ја донесе Советот на Општина Гостивар на денешната седница, по здравствената криза што го зафати градот во текот на летото.
Од 17 јули до 14 август водата од гостиварскиот водоводен систем не смееше да се користи за пиење, откако кај голем број граѓани беа регистрирани заболувања на дигестивниот систем. Поради состојбата беше прогласена епидемија, а подоцна и кризна состојба.
Претседателот на Советот на Општина Гостивар, Валдет Џафери, посочи дека првично се разгледувала можноста ослободувањето од плаќање да важи за два или три месеци. Сепак, при донесувањето на одлуката биле земени предвид финансиските можности на општината.
„Сметавме дека треба да биде два месеци или три, но идејата е да може тоа да се реализира, да се изврши“, рече Џафери.
Сметките во Гостивар ги опфаќаат услугите за водоснабдување и собирање отпад. Кај дел од домаќинствата потрошувачката на вода се пресметува според водомер, додека кај други се плаќа паушален износ. Надоместокот за собирање отпад кај куќите се определува според површината на станбениот простор и дворот.
Здравствената криза беше проследена и со истрага, откако полицијата во јули откри пумпи преку кои во водоводната мрежа се внесувала дополнителна вода од несоодветни извори. За случајот беа осомничени тројца раководители во ЈП „Комуналец“, на кои им беше определен притвор.
Епидемијата беше прогласена на 19 јули и траеше до 21 август, додека во Гостивар беше воведена и 30-дневна кризна состојба.
