Излет на планината Олимп во Грција завршил трагично за 32-годишен маж, кој го загубил животот по скок во природен базен со многу студена вода.
Според грчките медиуми, несреќата се случила во неделата (2 август), кога тој заедно со двајца пријатели пристигнал на локалитетот „Црвена Карпа“ во кањонот Орлиас, на надморска височина од околу 650 метри. По скокот во водата, најверојатно поради наглата промена на температурата, мажот доживеал срцев застој, а потоа се удавил.
Неговите пријатели веднаш побарале помош преку бројот 112. На местото интервенирале 14 пожарникари, кои по повеќе од два часа движење низ тежок и непристапен терен успеале да го извлечат.
Повредениот бил пренесен во Општата болница во Катерини, каде што лекарите само ја констатирале неговата смрт.
Надлежните служби спроведуваат истрага за сите околности на несреќата. Според првичните сознанија, се претпоставува дека екстремно студената вода предизвикала срцев застој, додека конечната причина за смртта ќе биде позната по обдукцијата.
