По убиството на 31-годишната жена во Битола, за кое е осомничен нејзиниот поранешен партнер, на социјалните мрежи се огласи Ина Многуфина со остра критика за состојбата во општеството и односот кон насилството врз жените.
„Скапано и нездраво општество полно пороци реди фемициди ко да е на натпревар“, напиша таа.
Во својата објава, Многуфина посочува дека проблемот е подлабок и го лоцира во, како што вели, долгогодишната традиција на непочитување на жените, толеранцијата кон насилството и институционалната незаинтересираност.
„Традиција на непочитување жени и мајки во семејството, тестостеронски успех ако тепаш жена, мижење на општеството за истото, менталната беда кај интелектуалниот дефицит кој коментира ‘сама си го барала’, општествена толеранција за насилниците, глува и слепа држава за години и години молење да се превземе нешто“, напиша таа.
Многуфина ја заврши објавата со порака:
„35 години ќе сме славеле, што славиме? Нека почива во мир жената од Битола.“
Според обвинителството, 33-годишниот осомничен утрото влегол во домот на поранешната партнерка додека спиела и ѝ нанел десетина убоди со нож, од кои починала на лице место. Тие имале четири заеднички малолетни деца.
