Во Македонија годинава се регистрирани 38 случаи на западнонилска треска, од кои 36 се потврдени, а два се водат како веројатни. Според најновиот неделен епидемиолошки извештај на Институтот за јавно здравје, дури 37 од заболените се од Скопје, а еден случај е регистриран во Велес.
Особено загрижува фактот што сите 38 случаи се со невроинвазивна форма на заболувањето, односно енцефалитис и/или менингитис, поради што сите пациенти биле хоспитализирани. Од нив, 37 биле лекувани на Клиниката за инфективни болести и фебрилни состојби, а еден во „Аџибадем Систина“.
Во периодот од 12 до 18 август биле пријавени 12 нови случаи, а регистрирани се и три нови смртни исходи. Вкупниот број починати од западнонилска треска во 2026 година достигна четири. Станува збор за мажи на возраст од 62 до 83 години, сите од Скопје. Кај тројца од починатите биле регистрирани и други придружни заболувања.
Од вкупно 38 случаи, 28 се мажи, а 10 жени. Најголемиот дел од заболените се лица над 60 години – дури 33, додека четворица се на возраст од 50 до 59 години, а еден е на возраст од 20 до 29 години. Просечната возраст на заболените е 67,3 години.
Според ИЈЗ, 37 случаи се автохтони, додека еден пациент имал историја на патување во Грција, но периодот на инкубација опфаќал и престој во Македонија.
Најголем број заболени, односно 24 лица, ги почувствувале првите симптоми во јули. Кај 11 лица симптомите започнале во август, кај двајца во јуни, а првиот регистриран случај годинава имал почеток на симптомите на 12 мај.
ИЈЗ констатира дека бројот на случаи значително се зголемил во текот на јули и почетокот на август, со изразена концентрација во Скопскиот регион. Најголем број случаи се регистрирани во Кисела Вода, особено во Драчево, како и во Гази Баба, каде што има поголема концентрација во руралните средини.
На 11 август, Центарот за јавно здравје Скопје пријавил епидемија на западнонилска треска во општините Кисела Вода, Гази Баба, Аеродром и Бутел. Од ИЈЗ оценуваат дека временската и просторната концентрација на случаите укажуваат на активна локална циркулација на вирусот.
Западнонилската треска во Македонија првпат е регистрирана во 2011 година. Во периодот од 2011 до крајот на 2025 година биле регистрирани 54 лабораториски потврдени случаи и пет смртни случаи поврзани со болеста. Само во 2026 година досега се регистрирани 38 од вкупно 92 случаи евидентирани од 2011 година до денес, што претставува 41,3 отсто од сите досега регистрирани случаи.
ИЈЗ оценува дека зголемувањето на бројот на заболени и нивната концентрација во одредени делови од Скопје укажуваат на интензивирана локална трансмисија на вирусот. Како клучни мерки за контрола се наведуваат засилениот епидемиолошки надзор, навременото спроведување програми за контрола на комарците и мерките за лична заштита од нивни каснувања.
