Во Македонија годинава се регистрирани 58 случаи на Западнонилска треска, од кои 54 се потврдени, а четири се водат како веројатни, покажува најновиот неделен епидемиолошки извештај на Институтот за јавно здравје.
Заклучно со 8 септември, најголем дел од заболените се од Скопје – вкупно 55 лица, додека по еден случај е регистриран во Велес, Куманово и Свети Николе. Од вкупниот број, 57 се автохтони случаи, а еден пациент има историја на патување во Грција, при што инкубацискиот период опфаќа и престој во Македонија.
Меѓу заболените има значително повеќе мажи – 46, односно 79,3 отсто, додека жените се 12, или 20,7 отсто. Најзастапена е највозрасната група, при што 47 лица, односно 81 отсто од случаите, се постари од 60 години. Просечната возраст на заболените е 66,1 година.
Кај најголем број пациенти, односно кај 38 лица или 65,5 отсто, симптомите започнале во август. Кај 17 лица симптомите се појавиле во јули, кај двајца во јуни, а кај еден пациент во мај. Првиот регистриран случај годинава имал почеток на симптоми на 12 мај.
Од вкупниот број заболени, 56 развиле невроинвазивна форма на болеста и сите биле хоспитализирани. Од нив, 43 лица се испишани, пет сè уште се лекуваат, а осум починале. Просечното траење на лекувањето кај испишаните и починатите пациенти изнесува 14 дена.
Во текот на годинава се регистрирани осум смртни случаи кај пациенти со невроинвазивна форма на Западнонилска треска, со смртност од 13,8 отсто меѓу потврдените случаи. Сите починати биле мажи од Скопје, со просечна возраст од 71,9 години. Кај седум од нив биле регистрирани и други придружни заболувања.
На 11 август ЦЈЗ Скопје пријави епидемија на Западнонилска треска во општините Кисела Вода, Гази Баба, Аеродром и Бутел.
Само во периодот од 2 до 8 септември биле пријавени два нови случаи – од Скопје и Свети Николе, а регистрирани се и два смртни исходи кај пациенти од Скопје.
