65 случаи на западнонилска треска во Македонија, најмногу во Драчево

Бројот на случаи на западнонилска треска во Македонија достигна 65, а осум лица починале, покажуваат податоците на Институтот за јавно здравје заклучно со 15 септември. Најголемо жариште останува Скопје, каде што се регистрирани 60 случаи.

— реклама —

Најголема концентрација има во општина Кисела Вода, особено во Драчево, како и на подрачјето на Гази Баба. Надвор од Скопје, по два случаи се регистрирани во Велес, а по еден во Куманово, Свети Николе и Кавадарци.

Од вкупно 65 случаи, 60 се лабораториски потврдени, а пет се водат како веројатни. Епидемиолошката истрага покажала дека 64 инфекции се автохтони, додека едно лице престојувало во Грција во периодот на инкубација.

— реклама —

Меѓу заразените има значително повеќе мажи – 51, односно 78,5 отсто, додека жените се 14 или 21,5 отсто.

— реклама —

Кај 63 лица се развила невроинвазивна форма на болеста, поради што биле хоспитализирани. Од нив, 61 пациент бил лекуван на Универзитетската клиника за инфективни болести и фебрилни состојби во Скопје, а по еден во приватните болници „Аџибадем Систина“ и „Жан Митрев“. Осум пациенти со невроинвазивна форма починале.

ИЈЗ посочува дека епидемиолошкиот надзор, контролата на комарците и личната заштита од убоди се клучни мерки за спречување на ширењето на болеста.

Во меѓувреме, Град Скопје од 16 до 19 септември спроведува терестична дезинсекција против возрасни комарци. Прскањето е предвидено од 22 до 3 часот, доколку временските услови го дозволуваат.