На денешната прес-конференција, членката на Извршниот одбор на СДСМ, Симона Цветановски обвини дека животниот стандард на граѓаните е значително влошен во изминатите две години, посочувајќи дека најголем дел од вработените не можат да ги покријат основните животни трошоци.
Цветановски изјави дека според податоците на Управата за јавни приходи за 2025 година, 73 отсто од граѓаните примаат плата пониска од просечната месечна плата во државата.
Таа наведе дека околу половина од вработените остваруваат месечни примања меѓу 24.000 и 36.000 денари и оцени дека, во споредба со минималната потрошувачка кошничка, ниту две такви плати не се доволни за покривање на основните трошоци на едно семејство.
Според Цветановски, растот на платите не го следи растот на цените, додека храната, комуналните трошоци и останатите основни производи стануваат сè поскапи. Таа ја критикуваше Владата и поради тоа што, според СДСМ, не ја зголемила минималната плата на 600 евра.
Од СДСМ предупредија дека новото поскапување на горивата дополнително ќе влијае врз цените на храната и ќе го зголеми притисокот врз семејните буџети.
Партијата оцени дека актуелните економски политики довеле до пад на животниот стандард и влошување на економската состојба на граѓаните.:::
