Преку објава на социјалните мрежи, членот на Извршниот одбор на Либерално-демократската партија (ЛДП), Дејанчо Цветановски, реагира на, како што наведува, тврдењата дека текстот на измените на Изборниот законик бил усогласен, оценувајќи дека станува збор за манипулации со јавноста.
Во објавата, Цветановски наведува дека ЛДП бара целосна транспарентност и повикува јавно да бидат објавени сите записници од работната група за измените на Изборниот законик, како и сите поднесени предлози и амандмани.
„ЛДП нема што да крие, ниту некогаш имала. Сè нека се стави на увид на јавноста, па граѓаните сами да видат кој зборува со факти, а кој фабрикува реалност“, наведува Цветановски.
Во објавата тој оценува дека пласирањето, како што вели, „очигледни невистини како готови факти“ е опасно и може да предизвика поделби во општеството, поради што повикува медиумите да се придржуваат до фактите и да се стави крај на политичките манипулации.
„Македонија заслужува искреност во политиката како единствена основа за реален прогрес. Граѓаните заслужуваат чист процес, а тоа започнува со вистината на маса“, се наведува во објавата на Цветановски.
