ЛДП

Зајкова: Колку жени уби молкот на институциите?

„Денес, наместо честитки и фалби, ќе прочитам неколку наслови: „Се откопува телото на уште една жена поврзана со потенцијален сериски убиец, претходната кај која се утврди насилна смрт имала пријавено дека сторителот ја следи“; „Мајка и дете загинаа по пад од зграда во Карпош, соседите велат дека постојано трпела насилство кое било пријавувано“; „Жена претепана од сопругот, 23-годишна девојка следена од поранешниот партнер“.Рамајана.Росица.Кате.Марија.Која треба да е следна? Дали сите треба да умреме за да проработи системот, вели претседателката на ЛДП, Моника Зајкова.“Дали треба уште едно име да стане хаштаг, уште една фотографија да стане црна рамка, уште едно дете да остане без мајка, уште една мајка/татко без ќерка – за институциите да сфатат дека молкот убива?Пријави за семејно насилство, закани. Но, од друга страна, институционален молк.И додека ние овде зборуваме за стратегии, акциски планови и родова еднаквост на хартија – жените умираат во реалноста.Собранието нема право да молчи и да се крие зад процедурите. Собранието има одговорност.Го отфрливте Законот за електронска нараквица за следење на сторителите на насилство. Без сериозна дебата и аргументи. Од тогаш само броиме жртви.А денес? Денес устите полни со поддршка за жените. Каде беше таа поддршка кога требаше да се обезбеди конкретен механизам за заштита? Каде е парламентарниот надзор за институциите што молчеле? Каде е одговорноста? Зошто институциите ги остават жртвите сами?Ова не се изолирани случаи. Ова е систем што реагира по притисок на јавноста, но не и по пријава.Денес нема да зборувам за платниот јаз. Нема да зборувам за недоволната застапеност на жените во политика. Нема да зборувам за несоодветната инфраструктура, за економско јакнење, за секојдневните предизвици на жените, кои ги има многу.Денес ќе зборувам за живот и смрт.Колку жени уби системот со своето молчење?Колку пријави останале и уште колку се наоѓаат во фиока?Колку пати сме слушнале: „Тоа е семејна работа“?Не, колеги. Тоа не е семејна работа. Тоа е државна одговорност. 8 Март не е ден за цвеќе и пригодни објави на социјални мрежи.8 Март е ден за вистина. А вистината е дека државата потфрли.И ако не сакаме следниот 8 Март повторно да го одбележиме со читање на имиња на жртви –тогаш мора веднаш да преземеме конкретни мерки.Не декларации. Не соопштенија.Затоа што секое одложување може да значи уште едно име. И тогаш нема да биде доволно да кажеме „изразуваме жалење“.Денес прашањето не е дали сме за правата на жените. Прашањето е дали им овозможуваме безбеден живот?Обврска е да покажеме дека системот може да штити, а не да молчи. Во спротивно, историјата нема да нѐ памети по честитките за 8 Март, туку по тишината додека жените умираа.Време е системот да проработи“, вели Зајкова.

Македонија | пред 7 часа

Гарческа: ЛДП бара итно расчистување на случајот во Тафталиџе и електронска нараквица за следење на насилниците

Повторно, Либерално-демократската партија (ЛДП) алармира и искажува сериозна загриженост за институционалната неодговорност и непреземањето на мерки за превенција и спречување на фемицидот и семејното насилство.„Немаме повеќе време за префрлање одговорност, ниту за административни изговори. Секое непостапување има последици и секое доцнење може да значи живот. Последниoт случај со смртта на мајката и ќерката во Тафталиџе, како и сите претходни, ја потресоа јавноста. Уште колку жртви треба да изброиме за институциите да се одважат да постапуваат по пријава?“, прашува во својата изјава за медиумите Тамара Гарческа од ЛДП.Уште колку смртни случаи треба да се случат за пратениците во Собранието да сфатат дека предлог-законот на ЛДП за воведување електронска нараквица за следење на насилниците не е повеќе опција, туку е обврска?„Како држава која ја ратификувала Истанбулската конвенција, Македонија има јасна задача: превенција, заштита, санкција. Не само декларативно, туку и реално. Нулта толеранција значи нула оправдувања. Јавноста е гневна – и со право. Бараме темелна истрага. Бараме целосно расчистување. Бараме одговорност со име и со презиме. Животот на жените не е статистика. Безбедноста не е привилегија“, завршува Гарческа во својата изјава со прашањето уште колку жени треба да умрат за институциите конечно да се разбудат и да постапуваат?

Македонија | пред 1 ден

Зајкова: Кога имате пријави за проблематично лице, кога жртвите ви го даваат ‘на тацна’ со име и презиме, дали е логично да не се преземе ништо?

Денес читаме наслов: 35-годишната жена чие убиство со поврзува со потенцијалниот сериски убиец, била следена од него и тоа било пријавено во полиција. Ова е наслов кој не смее да биде само уште една вест што ќе ја заборавиме утре. До кога ќе се молчи? Колку жртви треба да изброиме за некој да преземе одговорност?“, прашува во својата изјава за медиумите претседателката на Либерално-демократската партија (ЛДП) и пратеничка во македонското Собрание, Моника Зајкова.По немилите настани кои се случија во Кумановскиот регион, Зајкова потсетува дека иницијативата на ЛДП за електронска нараквица за следење на сторителите на насилство беше отфрлена во Собранието без сериозна аргументација. Денес, кога имаме две пријави против ист човек, една за давење, една за следење – и двете со име и презиме, се поставува прашањето зошто не било постапено од страна на надлежните институции?Зборуваме за општина со околу 3500 жители, не зборуваме за илјадници пријави дневно. Зборуваме за две жени кои побарале помош. Едната имала среќа и преживеала. Другата не. Првата јавно изјавува дека ништо не било преземено. Таткото на втората вели дека полицијата отишла кај осомничениот, но бидејќи не бил дома – тука завршило сè. Дали тоа е постапување? Дали тоа е заштита? До кога МВР ќе ги полни билтените со жени жртви на насилство, фемицид, убиства?! Дополнително, докторка констатирала насилна смрт кај двете жртви. Но, за едната не била побарана обдукција. Нејзините родители дури и не знаеле дека станува збор за насилна смрт. Како е можно, по констатација за насилна смрт, да не се побара обдукција? Каде повторно затаија институциите на системот. До кога молк од надлежните?“, прашува Зајкова.Претседателката упатува прашања и до надлежните за тоа дали има внатрешна истрага во полициската станица и кој одлучил да не се преземат мерки? Кој проценил дека нема ризик и кој ќе ја сноси одговорноста ако се утврдат пропусти?Кога имате пријави за проблематично лице, кога жртвите ви го даваат ‘на тацна’ со име и презиме, кога се појавуваат сомнителни околности, а медицинско лице посочува насилна смрт – дали е логично да не се преземе ништо? Колку жени ќе беа спасени ако се реагираше навреме? Не бараме сензација. Бараме одговорност. Не бараме политички поени. Бараме институционално постапување. И најмалку што јавноста заслужува е – одговор. Престанете да молчите“, порачува претседателката Зајкова во изјавата.

Македонија | пред 6 дена

Аврамовски: Возачите на камиони мора да бидат сметани за професионалци, а не за туристички патници

„Додека нашите владини претставници уверуваа за брзо решение со транспортерите,  претставникот на здружението ‘Меѓународен транспорт’, кое ги води преговорите со ЕУ за надминување на блокадите, изјави дека Унијата не прифатила ништо од нивните барања и дека се повторно се можни нови блокади“, изјави портпаролот на Либерално-демократската партија (ЛДП), Љубен Аврамовски.ЛДП уште пред две недели алармираше дека додека нашите министри се враќаат од Брисел со „одлични вести“ за надминувањето на проблемот со транспортерите и ЕУ, босанскиот министер за транспорт Един Форто, изјави дека засега “нема решение за проблемот со транспортерите и ќе има дополнителна работна група“.„Повторното нагласуваме, одложувањето на проблемот до септември не значи никакво решение, ниту одлична вест. Секој изминат ден за превозниците значи изгубено време и губење на заработката. Упатуваме апел до нашите државни претставници за искрена посветеност и сериозен ангажман во врска со надминување на моменталната криза со транспортерите. Возачите на камиони мора да бидат сметани за професионалци, а не за туристички патници“, вели Аврамовски во својата изјава за медиумите.

Македонија | пред 2 седмици

Европските либерали ја поддржуваат Македонија, ја поддржуваат демократијата и ја поддржуваат ЛДП

Групата на либерали и демократи од Европа (АЛДЕ) во Парламентарното собрание на Советот на Европа во Стразбур  јасно и недвосмислено говореа и ја поддржаа одлуката за затворање на пост-мониторинг дијалогот со Северна Македонија, оценувајќи дека земјата направила значителен демократски и институционален напредок.„Ја поздравуваме одлуката за затворање на пост-мониторингот за Северна Македонија, тоа е резултат на долгорочни реформи и јасна европска ориентација, при што либералната политика и ЛДП имаат значајна улога во тој процес”, истакнаа од АЛДЕ.Оваа одлука претставува силно европско признание за патот по кој треба да се движи државата и јасен сигнал дека проевропските и либерални политики се исправниот избор за иднината на Северна Македонија.Во своето обраќање, европските либерали нагласија дека Северна Македонија денес функционира како демократија во која, во најголем дел, се почитуваат основните човекови права и слободи, а соработката со Советот на Европа е стабилна и конструктивна.Пратениците од АЛДЕ посебно истакнаа дека затворањето на пост-мониторингот не значи затворање на надзорот, туку почеток на нова фаза на демократска зрелост, отчетност и одговорност, во која владеењето на правото, независното судство и борбата против корупцијата остануваат клучни приоритети.Во овој контекст, европските либерали уште еднаш ја потврдија својата долгогодишна и принципиелна поддршка за Либерално-демократската партија (ЛДП) и за либералните вредности во Северна Македонија, кои континуирано претставуваат двигател на европските реформи, заштитата на човековите права и развојот на отворено и демократско општество.Либералите во Европа потенцираа дека ЛДП останува нивен кредибилен партнер во Македонија и важен носител на либералната визија за слободно општество, силни институции, еднаквост и почитување на човечкото достоинство.Посебно внимание беше посветено на заштитата на правата на малцинствата, вклучително и правата на маргинализираните групи, како и на обврската за целосна примена на пресудите на Европскиот суд за човекови права, при што беше нагласено дека овие прашања се суштински дел од европската интеграција.

Македонија | пред 1 месец

Зајкова: Целосна поддршка за „Сејф Сити“ од мене како пратеничка и од ЛДП

Претседателката на Либерално-демократската партија (ЛДП) и пратеничка во македонското Собрание, Моника Зајкова, во објава на социјалните мрежи изрази целосна поддршка за реализација на проектот „Сејф Сити“.„ЛДП е за целосно спроведување на законите, за сите, без дискриминација и со еднакво третирање на сите граѓани. Кочење на закони кои водат до владеење на правото е неприфатливо, иако многу често го сведочевме и во блиското минато. Потребна ни е безбедна држава, правична држава. Денес, не утре! За 6 месеци ќе иницирам дебата со избирачите, особено во мојата изборна единица да се види како оди спроведувањето на законот и дали треба нешто да се подобри или промени во истиот“, пишува Зајкова во објавата.Во врска со денешното гласање, Зајкова посочува дека начинот на кој функционира Собранието – како пазар, а не како парламент на европска држава со ред и правила – е друга тема.„За тоа граѓаните ќе се изјаснат на избори. Пратениците не смеат да бидат спречени да имаат планирани активности со избирачите, со тие што им го дале мандатот, ниту во вршење на други службени обврски. Не може да има гласање само кога на мнозинството му одговара и кога тие имаат кворум. Дајте барем како Собрание да му покажеме европско однесување на народот ако веќе устата ни е полна за членство во ЕУ“, посочува претседателката Зајкова во објавата.

Македонија | пред 1 месец

ЛДП бара враќање на стариот член 353: Без лимити на казните и без застарување на корупцијата

На денешната амандманска расправа во Комисијата за политички систем и односи меѓу заедниците, посветена на новиот Кривичен законик, претседателката на Либерално-демократска партија и пратеничка, Моника Зајкова, поднесе амандман со кој се бара воспоставување поефикасна и построга правна рамка за борба против корупцијата во јавниот сектор.Зајкова побара со амандманите да се врати стариот член 353 од Кривичниот законик, иако, како што нагласи, таа лично не гласала за таа одредба во минатото. Според неа, старата формулација е подобра затоа што, во случаи кога со делото е предизвикана значителна штета, не постои горна граница на казната, туку минималната казна започнува од три години затвор, со можност таа да достигне и до 20 години, што директно ја отежнува можноста делото да застари.Таа остро реагираше и на предложените измени во членот 353-в, каде што се брише ставот 5, со кој, како што посочи, биле опфатени службени и одговорни лица во органите на државната управа, меѓу кои министри и директори именувани од Владата. Според Зајкова, со оваа интервенција практично се врши декриминализација на криминално однесување.„Не знам зошто е важно кој кога бил на власт. Ако веќе носите ваков закон, тогаш поправете ги слабостите што се направени. Која европска регулатива поставува лимити на казните за тешки кривични дела? Ако штетата е значителна, не може да има казна од-до. Треба да се оди кон највисоката граница на казнивост и на тој начин да се спречи застарувањето, кое често го гледаме во пракса“, изјави Зајкова на седницата.Во реплика на пратеникот Бојан Стојаноски, таа посочи дека со претходните измени на Кривичниот законик биле ослободени голем број лица, додавајќи дека доколку бил прифатен предлогот на ЛДП за воведување преодна одредба со која ќе се продолжи рокот на апсолутна застареност за предмети со првостепени пресуди кои се наоѓаат пред Апелациониот суд, немало да застарат и бројни случаи поврзани со негови сопартијци.Во реплика до пратеникот Љупчо Пренџов, Зајкова оцени дека кога ќе им се презентираат факти, дел од пратениците, како што рече, „глумат синдром на жртва“.Таа посебно се осврна и на делот за јавните набавки, наведувајќи дека бројни експерти укажуваат оти со предложените решенија се стеснува описот на кривичното дело и се декриминализираат одредени форми на незаконско однесување. Според неа, во законското решение не се опфатени клучни појави како фаворизирање на тендери, местење технички спецификации, избор на однапред познат понудувач, како и злоупотреба на јавни фондови и други државни средства.„Ако веќе правиме реформи, да ги направиме како што треба, а не да оставаме празнини што ќе значат амнестија за сериозни злоупотреби“, порача Зајкова.

Македонија | пред 1 месец

ЛДП бара владините повереници во четирите општини да не можат да се кандидираат за градоначалници

Либерално-демократската партија подготвува измени на Изборниот законик со кои ќе бара поверениците што Владата ќе ги назначи во општините во кои поради немање цензус не се избраа градоначалници, да не може да се кандидираат кога ќе бидат повторно организирани избори.,,Овие измени ЛДП ќе ги предложи за да нема никој нефер предност пред останатите кандидати за градоначалници, но и да се намали можноста за евентуални злоупотреби и несовесни работења на поверениците во периодот додека не се одржат повторените избори. Оваа предлог мерка доаѓа по прифаќањето на предлогот на ЛДП за враќање на референдумското отповикување на градоначалници во Законот за локална самоуправа, кој веќе се наоѓа во Собранието и со кој после 30 години од укинувањето на референдумот, ќе се стави крај на заштитата на неефикасните и нетранспарентни функционери”, велат од ЛДП.Според партијата, доколку се усвојат измените на Изборниот законик и се воведе ограничувањето за поверениците ќе се овозможат фер услови за коректен политички натпревар, ослободен од било какви сомнежи за дополнителни злоупотреби и политички влијанија.Во општините Гостивар, Врапчиште, Маврово и Ростуше и Центар Жупа не се постигна неопходната излезност во првиот круг и по 60 дена изборите почнуваат од почеток. Спикерот Гаши чека толкување и договор од кога течат роковите.

Македонија | пред 3 месеци

(Видео) „Секој насилник да носи електронска нараквица, трагедијата со Росица да биде последна“, бараат либералите

Трагичниот случај во Велес, во кој беа убиени Росица и нејзиниот татко, повторно ја отвори темата за потребата од посилна заштита на жртвите на семејно насилство. На денешната прес-конференција во Скопје, Либерално-демократската партија (ЛДП) побара итно усвојување на законските измени за воведување на електронски нараквици за насилниците.Членката на Извршниот одбор на ЛДП, Цветанка Геговска, посочи дека доколку измените предложени од пратеничката Моника Зајкова биле изгласани во април, сторителот ќе носел електронска нараквица и трагедијата можела да биде спречена.„Овој уред ја предупредува жртвата кога насилникот е на оддалеченост помала од 100 метри. Со тоа би се зголемил степенот на заштита и би се намалила можноста за повторно изложување на насилство,“ изјави Геговска.Од ЛДП порачаа дека измените се системска мерка за подобрување на механизмите за заштита и апелираа пратениците, независно од партиска или етничка припадност, да дадат поддршка во Собранието.„Граѓаните ги избраа своите претставници за да носат одлуки кои ќе го подобрат секојдневието. Нека трагедијата на Росица биде последна,“ нагласи Геговска.

Македонија | пред 5 месеци

Нема фотографија

ЛДП: Новите регистарски таблички за службените возила ќе значат крај на злоупотребите

По иницијативата за намалување на банкарските трошоци, уште еден предлог на Либерално-демократската партија (ЛДП) добива реализација, службените возила добиваат посебни регистарски таблички.Директорот на Службата за општи и заеднички работи, Ивица Томовски, потврди дека сите институции ќе мора да ги заменат табличките до крајот на годината. Првичниот рок од 15 септември е продолжен до 29 септември, а како конечен датум се споменува 31 декември, кога Министерството за внатрешни работи треба да го финализира регистарот на возилата.Новите црвени таблички со жолти ознаки ќе важат за сите возила во државна сопственост, а жолтите со црвени ознаки за специјални намени. Иако правилникот не предвидува казни за институциите што ќе доцнат, новите ознаки ќе станат задолжителни при првата регистрација. Според проценките, државата располага со околу 7.500 службени возила, но точната бројка ќе биде позната по изработката на регистарот.За ЛДП, оваа мерка е јасна порака дека јавните ресурси не се лична привилегија на малкумина. Ова е петти наш предлог прифатен од државните претставници во изминатата година, по иницијативите за референдум за отповикување градоначалници, толкувањето на заклучоците од ЕУ и одложеното дејство на уставните измени, намалувањето на банкарските провизии и зголемените инвестиции во домашната одбранбена индустрија.Апелираме институциите навремено да ја завршат постапката и да ги заменат регистарските таблички во законскиот рок. Само така, со транспарентно работење и институционална дисциплина можеме да ги спречиме злоупотребите во иднина и повторно да ја вратиме довербата на граѓаните во институциите.

Македонија | пред 5 месеци

ЛДП и ГРОМ одат заедно на локалните избори во Скопје

Либерално-демократската партија (ЛДП) ќе учествува на претстојните локални избори во Скопје во партнерство со ГРОМ, партијата на градоначалникот на Општина Карпош, Стевчо Јакимовски, информираше поранешниот министер за локална самоуправа и ексградоначалник на главниот град, Ристо Пенов.Тој нагласи дека заедно со доктор Никола Пановски ќе бидат носители на советничката листа. Според договорот, ЛДП ќе излезе самостојно на изборите, но ќе ги поддржи кандидатите на ГРОМ за градоначалници, додека пак ГРОМ ќе возврати со поддршка за кандидатите на ЛДП. Во моментов, ЛДП сè уште нема определено свој кандидат за градоначалник на Скопје.Пенов додаде дека партијата имала кратка размена на ставови со СДСМ за евентуален заеднички настап, а потсети и дека пред четири години ЛДП настапила самостојно, во коалиција со ДОМ, со што освоила значаен број гласови на повеќе локации, меѓу кои Скопје и Битола.

Скопје | пред 5 месеци

Предлогот на ЛДП за една изборна единица не доби поддршка во Собранието

Собранието на Република Северна Македонија не го усвои предлогот на Либерално-демократската партија (ЛДП) за измени на Изборниот законик, со којшто се предвидуваше воведување на една изборна единица и отворени листи. Предлогот, поднесен од пратеничката Моника Зајкова, доби поддршка од само 19 пратеници.Во своето излагање, Зајкова посочи дека актуелниот модел со шест изборни единици резултира со нерамноправност на гласот на граѓаните и претставува повреда на уставниот принцип за еднаквост. Таа смета дека воведувањето на една изборна единица и отворени листи би придонело за зголемување на демократскиот капацитет на изборниот процес и овозможување на поголемо влијание на граѓаните врз изборот на пратеници.И покрај претходните јавни изјави на претседателот на ВМРО-ДПМНЕ, Христијан Мицкоски, дека партијата поддржува една изборна единица, пратениците на оваа опозициска партија не гласаа за предлогот.ДУИ, пак, изрази условна поддршка, сугерирајќи воведување на изборен праг од 3 % од вкупно регистрираните или 5 % од излезените гласачи како предуслов за примената на вакви измени.

Македонија | пред 8 месеци

Наместо пари за питијади и ајваријади, општините да инвестираат во повеќе јавни паркинзи, зеленило и подобри услови во градинките и училиштата, вели Аврамовски

Либерално-демократската партија (ЛДП) упатува јавен повик до општините ширум државата: да престанат со расфрлање на јавните средства за еднодневни настани и манифестации како што се питијади, ајваријади, скара фестови и слични пригоди.„Наместо тоа, ги повикуваме општинските власти да ги насочат парите кон проекти кои навистина значат подобар живот за граѓаните: повеќе јавни паркинг места, повеќе зеленило и паркови, подобри услови во градинките и училиштата. Јавните финансии мора да се трошат одговорно и домаќински“, вели во изјава за медиумите портпаролот на ЛДП, Љубен Аврамовски.На граѓаните не им требаат свечености еднаш годишно, посочува Аврамовски, туку чист воздух, безбедни улици, функционални училишта и паркинг решенија секој ден.„ЛДП стои на ставот дека локалната самоуправа треба да покаже зрелост и визија. Затоа ги повикуваме сите градоначалници и советници: наместо да се натпреваруваат кој ќе донесе поголема музичка ѕвезда или ќе организира поголема питијада – да се натпреваруваат кој ќе реализира повеќе конкретни, видливи и одржливи проекти за своите сограѓани“, заклучува Аврамовски.Парите од буџетот се пари од граѓаните и треба да им се вратат преку инвестиции што ќе го подобрат нивниот секојдневен живот.

Македонија | пред 8 месеци

ЛДП и ДС се за една изборна единица, ВМРО-ДПМНЕ ги поддржува

По трет пат ЛДП предлага Македонија да биде една изборна единица.Ова досега беше одбивано во претходните два парламентарни состави.Од ЛДП сега очекуваат поддршка од пратениците.„И денес, како и претходно, даваме силна поддршка за воведување на една изборна единица, отворени листи, како и вклучување на предлозите од граѓанскиот сектор за независни листи во креирање на новиот Изборен законик. Ова не е нова иницијатива на ЛДП. Ја нагласуваме потребата од праведен и транспарентен изборен модел, кој ќе обезбеди еднаквост на гласот и директно на граѓаните во изборот на нивните претставници. Цврсто веруваме дека оваа промена ќе донесе поголема транспарентност, поголема одговорност на избраните претставници, како и посилна демократија во нашата земја”, вели Љубен Аврамовски портпарол на ЛДП.„Ваквите измени ќе значат силен поттик на демократизација на изборниот процес и на државата во целина, како и демонтажа на еднопартискиот систем на владеење и зголемување на одговорноста на извршната и законодавната власт“, вели лидерот на Демократскиот сојуз, Павле Трајанов.Во врска отворените листи, Трајанов вели дека искуствата во другите држави покажале многу слабости. Предлагаат на претстојните локални избори да се почне со отворени листи за советници само во неколку општини и тоа Центар, Струга и Гевгелија.Премиерот Христијан Мицкоски за предлогот на ЛДП за воведување една изборна единица во новиот Изборен законик рече дека пратеничката група на ВМРО -ДПМНЕ ќе поддржи предлог за една изборна единица со право да гласа и дијаспората.

Македонија | пред 9 месеци

Ќе добие ли Македонија една изборна едниица

По трет пат ЛДП предлага Македонија да биде една изборна единица.Ова досега беше одбивано во претходните два парламентарни состави.Од ЛДП сега очекуваат поддршка од пратениците.„И денес, како и претходно, даваме силна поддршка за воведување на една изборна единица, отворени листи, како и вклучување на предлозите од граѓанскиот сектор за независни листи во креирање на новиот Изборен законик. Ова не е нова иницијатива за ЛДП. поддршка.Ја нагласуваме потребата од праведен и транспарентен изборен модел, кој ќе обезбеди еднаквост на гласот и директно на граѓаните во изборот на нивните претставници. Цврсто веруваме дека оваа промена ќе донесе поголема транспарентност, поголема одговорност на избраните претставници, како и посилна демократија во нашата земја”, вели Љубен Аврамовски портпарол на ЛДП.,,Ваквите измени ќе значат силен поттик на демократизација на изборниот процес и на државата во целина, како и демонтажа на еднопартискиот систем на владеење и зголемување на одговорноста на извршната и законодавната власт“, вели лидерот на Демократскиот сојуз, Павле Трајанов.Во врска отворените листи, Трајанов вели дека искуствата во другите држави покажале многу слабости. Предлагаат на претстојните локални избори да се почне со отворени листи за советници само во неколку општини и тоа Центар, Струга и Гевгелија.Премиерот Христијан Мицкоски за предлогот на ЛДП за воведување една изборна единица во новиот Изборен законик рече дека пратеничката група на ВМРО -ДПМНЕ ќе поддржи предлог за една изборна единица со право да гласа и дијаспората.

Македонија | пред 9 месеци